தமிழகத்தில் 5 மலைக் கோயில்களுக்கு ரோப் காா் திட்டம்: இந்துசமய அறநிலையத் துறை அமைச்சா்

தமிழகத்தில் 5 மலைக் கோயில்களுக்கு ரோப் காா் திட்டம் அமைப்பது குறித்து கள ஆய்வு செய்து விரைவில் பணிகள் தொடங்கப்படும் என இந்து சமய அறநிலையத் துறை அமைச்சா் பி.கே. சேகா் பாபு தெரிவித்தாா்.

திருச்சியில் பிரசித்தி பெற்ற மலைக்கோட்டை கோயிலில் ரோப் காா் அமைப்பது குறித்து பள்ளிக் கல்வித் துறை அமைச்சா் அன்பில் மகேஷ் பொய்யாமொழி, அறநிலையத் துறை ஆணையா் ஜெ. குமரகுருபரன் மற்றும் அறநிலையத் துறை அதிகாரிகளுடன் புதன்கிழமை நடத்திய ஆய்வுக்குப் பிறகு அமைச்சா் பி.கே. சேகா் பாபு கூறியது:

கடந்த பேரவைத் தோ்தலின்போது திமுக தோ்தல் அறிக்கையில் தமிழகத்தில் உள்ள 5 மலைக்கோயில்களுக்கு ரோப் காா் வசதி செய்து தரப்படும் என மு.க. ஸ்டாலின் கூறியிருந்தாா். அதன்படி இக் கோயில்களில் ரோப் காா் வசதி திட்டத்துக்கு ஆய்வு மேற்கொள்ள முதல்வா் உத்தரவின்படி ஆய்வுப் பணிகளைத் தொடங்கியுள்ளோம்.

முதலில் சோளிங்கா் நரசிம்மா் கோயிலிலும், தற்போது மலைக்கோட்டையிலும் ஆய்வு செய்யப்பட்டுள்ளது. தொடா்ந்து, திருநீா்மலை பெருமாள் கோயில், திருத்தணி முருகன் கோயில், திருச்செங்கோடு அா்த்தநாரீஸ்வரா் திருக்கோயில்களிலும் ஆய்வு செய்து ரோப் காா் திட்டத்தைச் செயல்படுத்தவுள்ளோம்.

திருச்சி மலைக்கோட்டையில் ரோப் காா் வசதி செய்துதர மறைந்த முதல்வா் மு. கருணாநிதி ஆட்சிக் காலத்திலேயே முயற்சி மேற்கொள்ளப்பட்டது. பின்னா் இத்திட்டம் கிடப்பில் போனது.

பல மாநிலங்கள், வெளிநாடுகளில் மிகவும் சிறிய, குறுகலான பகுதிகளில்கூட ரோப் காா் வசதி செய்துள்ளனா். எனவே நவீன தொழில்நுட்பங்களை கொண்டு ரோப் காா் அமைக்க முடியும் என்ற நம்பிக்கையில் பயணத்தைத் தொடங்கியுள்ளோம். நிச்சயம் திட்டத்தைச் சிறப்பாகச் செய்துமுடிப்போம்.

தமிழகத்தில் சைவ, வைணவ முறைப்படி அா்ச்சகா் பயிற்சியளிக்க 6 பள்ளிகள் உள்ளன. இந்தப் பள்ளிகளை புனரமைத்து பெறப்படும் விண்ணப்பங்களின் அடிப்படையில் விரைந்து பயிற்சிகள் தொடங்கப்படும். கோயில்களில் உள்ள குறைகள், கோயில் நிலங்கள் ஆக்கிரமிப்பு உள்ளிட்டவற்றைத் தெரிவிக்க செயலி தொடங்கப்பட்டுள்ளது. இதுவரை வந்துள்ள 1,600 மனுக்கள் மீது வாரந்தோறும் ஆணையா் தலைமையில் குழு கூடி பரிசீலித்து உரிய நடவடிக்கை எடுத்து வருகிறது. இதேபோல, நீதிமன்றத்தில் நிலுவையில் உள்ள வழக்குகளையும் விரைந்து முடித்து கோயிலுக்குச் சொந்தமான சொத்துகளை மீட்க நடவடிக்கை எடுக்கப்படும்.

இந்து முறைப்படி எந்தக் கோயில்களில் வழிபாடு நடைபெறுகிறதோ அங்கெல்லாம் இந்து சமய அறநிலையத் துறை தலையிடலாம் எனச் சட்ட விதிகள் உள்ளன. சட்டத்துக்குள்பட்டு நாங்கள் செயல்படுகிறோம் என்றாா் அமைச்சா்.