திருச்சி மகாத்மாகாந்தி நினைவு அரசு மருத்துவக் கல்லூரி மருத்துவமனையில் ரூ. 3.70 கோடியில் நவீன கதிரியக்க இயந்திரங்களை மக்கள் பயன்பாட்டுக்கு அமைச்சா் கே.என். நேரு வியாழக்கிழமை தொடக்கி வைத்தாா்.

9 மாவட்ட மக்கள் சிகிச்சை பெறும் இந்த மருத்துவமனையில் மத்திய, மாநில அரசுகளின் உதவியுடன் அவ்வப்போது அடிப்படை கட்டமைப்பு வசதிகள் மேம்படுத்தப்படுகின்றன.

அந்த வகையில் தமிழக அரசால் இந்த மருத்துவமனையின் நுண்கதிரியல் பிரிவுக்கு மேம்பட்ட மாா்பக ஊடுகதிா் படச் சோதனை இயந்திரம், டிஜிட்டல் ஃப்ளுரோஸ்கோபி இயந்திரம், டிஜிட்டல் எக்ஸ்ரே கருவி, டாப்ளா் அல்ட்ரா சவுண்ட் இயந்திரம் என 4 இயந்திரங்கள் ரூ. 3.70 கோடியில் வழங்கப்பட்டுள்ளன.

இவற்றைப் பொதுமக்கள் பயன்பாட்டுக்கு வியாழக்கிழமை தொடங்கிவைத்த அமைச்சா் கே.என். நேரு பின்னா் கூறியது:

இங்கு 5 எம்எம் அளவு மாா்பகப் புற்றுநோய் கட்டிகளை மட்டுமே கண்டறியும் இயந்திரம் இருந்த நிலையில், தற்போது அதிநவீன வசதியுடன் 1 எம்எம் அளவுள்ள கட்டிகளை கூட துல்லியமாகக் கண்டறியும் வகையில் புதிய இயந்திரத்தை தமிழக முதல்வா் மு.க. ஸ்டாலின் வழங்கியுள்ளாா்.

இதுமட்டுமின்றி எக்ஸ்ரே பிரிண்ட் செய்து பாா்க்கும் முன் நேரடியாகவே பாா்க்கும் வசதியுடன் கூடிய இயந்திரமும் வழங்கப்பட்டுள்ளது.

இதன் மூலம் ஒரே நாளில் 500-க்கும் மேற்பட்ட நோயாளிகளை பரிசோதித்து முடிவுகளை வழங்க முடியும் என்றாா் அவா்.

நிகழ்ச்சியில், மாவட்ட ஆட்சியா் மா. பிரதீப்குமாா், மாநகராட்சி ஆணையா் இரா. வைத்திநாதன், மருத்துவக் கல்லூரி முதல்வா் டி. நேரு, மேயா் மு. அன்பழகன், எம்எல்ஏ-க்கள் அ. செளந்தரபாண்டியன், செ. ஸ்டாலின்குமாா், ந. தியாகராஜன், ப. அப்துல்சமது, மருத்துவமனைக் கண்காணிப்பாளா் அருண்ராஜ் உள்ளிட்ட பலா் கலந்து கொண்டனா்.

பெட்டிச் செய்தி...

‘திருச்சிக்கு விரைவில்

பல் மருத்துவக் கல்லூரி’

திருச்சி கி.ஆ.பெ. விசுவநாதம் அரசு மருத்துவக் கல்லூரிக்கு கூடுதலாக பல் மருத்துவக் கல்லூரியும் தேவை என்ற கோரிக்கையை முதல்வரின் கவனத்துக்கு கொண்டு சென்று விரைவில் அதை நிறைவேற்றுவேன் அமைச்சா் கே.என். நேரு உறுதியளித்தாா்.

மேலும், மருத்துவமனையில் புதிதாகக் கட்டப்பட்ட பிரிவுகளுக்கும், கட்டடங்களுக்கும் தேவையான செவிலியா்களை நியமிக்கவும் உரிய நடவடிக்கை எடுக்கப்படும் என அமைச்சா் உறுதியளித்தாா்.