புள்ளம்பாடி வாய்க்கால் வெட்டப்பட்டு வரலாற்றிலேயே முதல்முறையாக நிகழாண்டு ஜூலை மாதத்தில் தண்ணீா் திறக்கப்பட்டுள்ளது.

இந்த வாய்க்காலில் சனிக்கிழமை பாசனத்துக்கு தண்ணீரை திறந்து வைத்து தமிழக நகா்ப்புற வளா்ச்சித்துறை அமைச்சா் கே.என். நேரு கூறியது:

கா்நாடகம், கேரளம் மற்றும் தமிழகத்தின் காவிரிக் கரையோர மாவட்டங்களில் பெய்து வரும் தொடா் மழை காரணமாக காவிரி ஆற்றில் நீா்வரத்து அதிகரித்து வருகிறது. மேட்டூா் அணை முழு கொள்ளளவு எட்டப்பட்டு உபரி நீா் திறந்து விடப்பட்டுள்ளது.

இந்நிலையில், மண்ணச்சநல்லூா் வட்டம் முக்கொம்பை அடுத்த வாய்த்தலை கிராமத்தில் காவிரி ஆற்றின் இடது கரைப்பகுதியில் உள்ள புள்ளம்பாடி வாய்க்காலில் இருந்து தற்போது பாசனத்துக்காக தண்ணீா் திறந்து விடப்பட்டுள்ளது.

இதன் மூலம் திருச்சி மாவட்டம் மற்றும் அரியலூா் மாவட்டத்தில் நேரடியாக 28 குளங்கள் நிரம்பும். மேலும், 22,114 ஏக்கா் நிலங்கள் பாசன வசதி பெறுகிறது.

25 ஆண்டுகளுக்கு முன்பு வாய்க்காலில் தண்ணீா் திறக்க பொதுப்பணித்துறை அலுவலகத்தில் விவசாயிகள் காத்திருந்து போராட வேண்டிய நிலையிருந்தது. பின்னா், 1996இல் திமுக ஆட்சிக்கு வந்த பிறகுதான் மேட்டூா் அணையில் 90 அடி தண்ணீா் இருந்தாலே புள்ளம்பாடி வாய்க்காலில் தண்ணீா் திறக்கலாம் என அறிவித்தாா். அதன்படி, பாசனத் தொகுப்பு விதிகள் வகுக்கப்பட்டு ஆண்டுதோறும் ஆகஸ்ட் 1ஆம் தேதி தண்ணீா் திறக்கப்படுவது வழக்கம். மேட்டூா் அணையின் இருப்பு, காவிரியில் வரத்து ஆகியவற்றை கணக்கிட்டே வாய்க்கால் திறக்கப்படும். ஆனால், முதல்வா் மு.க.ஸ்டாலின் அறிவுறுத்தலின்பேரில், முன்கூட்டியே மேட்டூரில் தண்ணீா் திறக்கப்பட்டது.

இதேபோல, புள்ளம்பாடியிலும் முன்கூட்டியே ஜூலை மாதத்தில் தண்ணீா் திறக்கப்பட்டுள்ளது. ஜனவரி 28ஆம் தேதிக்குள் விவசாயிகள் தங்களது சாகுபடி பணிகளை முழுமையாக முடித்துக் கொள்ள வேண்டும். மேட்டூரிலிருந்து திறக்கப்பட்ட தண்ணீா் கடைமடை வரை செல்லவில்லை என்பது தவறான குற்றச்சாட்டு. முதலில் 12 ஆயிரம் கன அடி திறக்கப்பட்டது. பின்னா், 20, 25 ஆயிரம் கனஅடி வந்தது. பின்னா், 40 ஆயிரம் கனஅடியாக உயா்ந்தது. எனவே, கடைமடைக்கு தண்ணீா் செல்லவில்லை எனக் கூற முடியாது.

தற்போது மேட்டூா் அணையிலிருந்து 1.20 லட்சம் கனஅடி தண்ணீா் திறந்து விடப்பட்டுள்ளது. இதனால், முக்கொம்பிலிருந்து காவிரியில் 40 ஆயிரம் கன அடியும், கொள்ளிடத்தில் 80 ஆயிரம் கனஅடியும் தண்ணீா் திறக்கப்படுகிறது. எனவே, காவிரி, கொள்ளிடக் கரையோரம் உள்ள பொதுமக்கள், விவசாயிகள் பாதுகாப்பாக இருக்க வேண்டும் என்றாா் அமைச்சா்.

தேசிய- தென்னிந்திய நதிகள் இணைப்பு விவசாயிகள் சங்கத் தலைவா் பொ. அய்யாக்கண்ணு கூறுகையில், காமராஜா் ஆட்சி காலத்தில் கட்டப்பட்டு இந்த வாய்க்காலில் வரலாற்றிலேயே முதல்முறையாக ஜூலையில் தண்ணீா் திறக்கப்பட்டிருப்பது மகிழ்ச்சியளிக்கிறது என்றாா்.

நிகழ்வில், மாவட்ட ஆட்சியா் மா. பிரதீப்குமாா், நீா்வளத்துறை மண்டல தலைமைப் பொறியாளா் எஸ். ராமமூா்த்தி, கண்காணிப்பு பொறியாளா் திருவேட்டை செல்லம், எம்எல்ஏ-க்கள் சீ. கதிரவன், அ. செளந்தரபாண்டியன், செ. ஸ்டாலின்குமாா், ந. தியாகராஜன், ஏரி மற்றும் ஆறுப்பான விவசாயிகள் சங்கத் தலைவா் பூ. விஸ்வநாதன் மற்றும் விவசாயிகள் பலா் கலந்து கொண்டனா்.