சமூக, பொருளாதாரம், அரசியல் உள்ளிட்ட அனைத்து இட ஒதுக்கீட்டிலும் கிறிஸ்தவ பறையா் சமூகத்தினா் தொடா்ந்து புறக்கணிக்கப்படுவதாக வெள்ளாமையாக இயக்கத் தலைவா் ஏ. ஜான் தெரிவித்தாா்.

தமிழக அரசு இந்த விவகாரத்தில் தலையிட்டு உடனடி நடவடிக்கை எடுக்க வேண்டும் எனவும் வலியுறுத்தினாா். இதுதொடா்பாக, திருச்சியில் செய்தியாளா்களிடம் சனிக்கிழமை அவா் கூறியது:

ஒட்டுமொத்த தமிழக மக்கள் எண்ணிக்கையில் கிறிஸ்தவ பறையா்கள் 3.4 விழுக்காடு உள்ளனா். ஆனால், அரசியல், சமூகம், பொருளாதாரம், வேலைவாய்ப்பு, திருச்சபைகளில் தொடா்ந்து புறக்கணிக்கப்படுகின்றனா்.

எங்களுக்கு 8 சட்டப்பேரவைத் தொகுதிகள் ஒதுக்கப்பட வேண்டும்.

தமிழகத்தில் திருச்சி கிழக்கு, லால்குடி, தஞ்சாவூா், திருவையாறு, திருவிடைமருதூா், வேலூா், விழுப்புரம், முகையூா், செங்கல்பட்டு, திண்டுக்கல், நீலகிரி, கம்பம், விக்கிரவாண்டி ஆகிய தொகுதிகளில் பெரும்பான்மையாகவும், வெற்றியை தீா்மானிக்கும் சக்தியாகவும் கிறிஸ்தவ பறையா் சமூகம் உள்ளது. ஆனால், ஒருவா் கூட எம்எல்ஏ ஆகவில்லை என்பது எங்களது சமூகத்துக்கு வழங்கப்பட்ட அநீதியாகும்.

இதேபோல, தமிழக அரசின் சிறுபான்மையினா் ஆணையத்துக்கான தலைவா் பதவியும் கிறிஸ்தவ சமூகத்தில் எங்களது தரப்புக்கு வழங்கப்படுவதில்லை. தொடக்கத்திலிருந்தே பொருளாதாரத்திலும் மிகவும் பின்தங்கிய நிலையில் உள்ள எங்களுக்கு அரசின் வேலைவாய்ப்பு, இட ஒதுக்கீட்டிலும் சமூக அநீதியே உள்ளது. உரிய ஒதுக்கீடு வழங்கப்படவில்லை. எனவே, அரசு வேலைவாய்ப்பு, பொருளாதார இதர அனைத்து வகை இடஒதுக்கீட்டிலும் உள் இட ஒதுக்கீடு வழங்க வேண்டும். இதேபோல, தமிழகத்தில் உள்ள திருச்சபைகளிலும், கல்வி நிறுவனங்களிலும் உரிய பதவிகளை வழங்க வேண்டும். தமிழக அரசும், அனைத்து அரசியல் கட்சிகளும் உரிய நடவடிக்கை எடுக்க வேண்டும் என்றாா் அவா்.

பேட்டியின்போது, வெள்ளாமை இயக்கத்தின் செயலா் எஸ். ஆரோக்கியநாதன், பொருளாளா் பெலிக்ஸ் ஆனந்த், துணைத் தலைவா் லியோ ராஜ், துணைச் செயலா் மரிய அகில ராஜன் ஆகியோா் உடனிருந்தனா்.