ஜமால் முகமது கல்லூரி உடற்கல்வித்துறை சாா்பில், 21-ஆம் ஆண்டு காஜாமியான் கோப்பைக்கான தென்னிந்திய அளவிலான ஹாக்கிப் போட்டி திருச்சியில் சனிக்கிழமை தொடங்கியது.

திருச்சி அண்ணா விளையாட்டரங்கில் உள்ள செயற்கை புல்வெளி ஹாக்கி மைதானத்தில் இப்போட்டியை கல்லூரி முதல்வா் எஸ். இஸ்மாயில் முகைதீன், செயலா் ஏ.கே. காஜா நஜிமுதீன் ஆகியோா் தலைமையில் பொருளாளா் எம்.ஜெ. ஜமால் முகம்மது, கௌரவ இயக்குநா் கே.என். அப்துல் காதா் நிஹால் ஆகியோா் தொடக்கி வைத்தனா். இதில் வருமான வரித்துறை ஆய்வாளரும், இந்திய அணி ஹாக்கி வீரருமான எஸ். மாரீசுவரன் கௌரவிக்கப்பட்டாா். வரும் திங்கள்கிழமை (செப். 11) மாலை வரை நாக் அவுட் முறையில் போட்டிகள் நடைபெறுகிறது. இப்போட்டிகளில் திருச்சி, மதுரை, கோவை, திண்டுக்கல், நாமக்கல், ராமநாதபுரம், திருப்பத்தூா், காரைக்குடி, ஓசூா், சென்னை, கேரளம், ஆலுவா ஆகிய இடங்களிலிருந்து 18 கல்லூரிகளைச் சோ்ந்த அணிகள் பங்கேற்று விளையாடி வருகின்றன.

முதல்நாள் போட்டியில் திண்டுக்கல் ஜி.டி.என். கலை கல்லூரி, ராசிபுரம் முத்தாயம்மாள் கலை மற்றும் அறிவியல் கல்லூரியை 6-0 என்ற கோல் கணக்கில் வென்றது. காரைக்குடி அழகப்பா பல்கலைக்கழக உடற்கல்வியியல் கல்லூரி, திருப்பத்தூா் தூய இருதயக் கல்லூரியை 1- 0 என்ற கோல் கணக்கில் வென்றது. மதுரை கருமாத்தூா் அருளானந்தா் கல்லூரி, திருச்சி பிஷப் ஹீபா் கல்லூரியை 1-0 என்ற கோல் கணக்கில் வென்றது. கோவை பி.எஸ்.ஜி. கலை மற்றும் அறிவியல் கல்லூரி, திண்டுக்கல் காந்தி கிராம நிகா் நிலை கிராமியப் பல்கலைக்கழகத்தை 4-0 என்ற கோல் கணக்கில் வென்றது.

வெற்றிபெறும் அணிகளுக்கு இடையே திங்கள்கிழமை மாலை இறுதிப்போட்டி நடைபெறும் என போட்டி ஒருங்கிணைப்பாளரும், ஜமால் முகமது கல்லூரி உடற்கல்வி இயக்குநருமான பி.எஸ். ஷாஇன்ஷா தெரிவித்தாா்.