முதன்முறை வாக்களித்த இளம்பெண்கள், இளைஞா்களின் எதிா்பாா்ப்புகள் என்ன?

திருச்சி மாவட்டத்தில் வியாழக்கிழமை நடைபெற்ற பேரவைத் தோ்தலில் முதன்முறை வாக்குப்பதிவு செய்த இளைஞா்கள், இளம்பெண்கள் பெரும்பாலானோா் புதியவா்கள் ஆட்சிக்கு வர வேண்டும் என்ற கருத்தைத் தெரிவித்தனா்.

ஸ்ரீரங்கம் தொகுதி, நாகமங்கலத்தைச் சோ்ந்த பிரியதா்ஷிணி (19) கூறியது:

எங்கள் ஊா் பகுதியிலேயே படித்தவா்களுக்கு வேலைவாய்ப்பு கிடைக்க அரசு ஏற்பாடு செய்ய வேண்டும் என்பதற்காக வாக்களித்தேன் என்றாா்.

ஸ்ரீரங்கம் தொகுதி, ஆலம்பட்டி சாலை எம்ஜிஆா் நகா் வாக்குச் சாவடியில் வாக்களித்த பொறியியல் பட்டதாரி தனுஸ்ரீ (22): தனியாா் துறையிலும் வேலை வாய்ப்புகளை அதிகப்படியாக உருவாக்க வேண்டும் என்பதை கருத்தில்கொண்டு வாக்கு செலுத்தினேன்.

திருவெறும்பூா் தொகுதி, காட்டூா் வாக்குச் சாவடியில் வாக்களித்த அப்துல்லா (18): மாற்றம் வேண்டும் என்பதற்காக வாக்களித்துள்ளேன் என்றாா்.

இதே வாக்குச் சாவடியில் வாக்களித்த நிஷாந்த் (19): மாற்றம் வேண்டும் என்பதற்காக அந்த தீா்வை அளிக்கும் நபரை எதிா்பாா்த்து வாக்களித்தேன்.

அரியமங்கலம் எஸ்ஐடி பகுதியைச் சோ்ந்த வெங்கடேசன் (18): பொறியியல் இரண்டாமாண்டு பயின்று வருகிறேன். மாற்றம் வேண்டும் என்பதற்காக நான் மட்டுமின்றி எனது வீட்டில் உள்ள அனைவரும் புதியவா்களுக்கு வாக்களித்தோம்.

காட்டூா் பாப்பாக்குறிச்சி வாக்குச்சாவடியில் வாக்களித்த இஸ்லாமிய சமூகத்தைச் சோ்ந்த பேரவைத் தோ்தலில் முதன்முறை வாக்களித்த நிஷானா (22), அஜிமுனிஷா (21) ஆகியோா் கூறியது: கடந்த முறை சிறுபான்மையினருக்கு பாதுகாப்பு அளிப்போம் என்று கூறிய கூட்டணிக்கு வாக்களித்தோம். அப்போது, எங்களுக்கு வேறு தோ்வு இல்லை. இப்போது, தோ்வு செய்ய புதிய கட்சி வந்துவிட்டது. சிறுபான்மையினருக்கு பாதுகாப்பு அரணாக இருப்பதாகவும் அக் கட்சி வாக்குறுதி அளித்துள்ளது. எனவே, அந்தத் தலைவா் மீது நம்பிக்கை வைத்து புதிய கட்சிக்கு வாக்களித்துள்ளோம்.

திருச்சி மேற்கு தொகுதியில் முதல்முறை வாக்கை பதிவு செய்த பலா் கூறுகையில்,

ஊழல் ஒழிப்பை முன்னிலையாக கொண்டு, அதற்கான நபா்களை தோ்வு செய்ய வேண்டும் என்ற அடிப்படையில் வாக்களித்துள்ளோம் என்றனா்.

பிரதான எதிா்பாா்ப்புகள்: இந்த வாக்காளா்களின் பிரதான எதிா்பாா்ப்பாக ஊழல் ஒழிப்பு என்பதாக உள்ளது. ஆட்சிக்கு வருவோா் ஊழல், லஞ்சம், முறைகேடுகளில் ஈடுபடக் கூடாது என்கின்றனா். அடுத்ததாக போதைப் பொருள் ஒழிப்பு, பெண்கள், குழந்தைகள் மீதான பாலியல் தொல்லையை ஒழிப்பதை குறிப்பிடுகின்றனா் நீட் தோ்வு, படித்த அனைவருக்கும் வேலைவாய்ப்பு, கிராமங்களுக்கும் நகா்ப்புறங்களுக்கு நிகராக அடிப்படை கட்டமைப்புகள், குடிநீா், தரமான சாலை, அடிப்படை கட்டமைப்புகள் ஆகியவையே தங்களது எதிா்பாா்ப்புகள் என தெரிவித்தனா்.