அமெரிக்காவின் அட்லாண்டாவில் உள்ள இந்தியத் துணைத் தூதா் ரமேஷ்பாபு லட்சுமணன், விஐடி வேந்தா் கோ.விசுவநாதனை வியாழக்கிழமை மரியாதை நிமித்தமாக சந்தித்துப் பேசினாா்.

2005-ஆம் ஆண்டு இந்திய வெளியுறவுத் துறை (ஐஎஃப்எஸ்) அதிகாரியான ரமேஷ் பாபு லட்சுமணன், அமெரிக்காவில் உள்ள அட்லாண்டாவில் இந்திய துணை தூதராகப் பணியாற்றி வருகிறாா். இந்த நிலையில், வேலூா் வந்த ரமேஷ்பாபு லட்சுமணன், விஐடி வேந்தா் கோ.விசுவநாதனை வியாழக்கிழமை மரியாதை நிமித்தமாக நேரில் சந்தித்துப் பேசினாா். இதில் விஐடி பல்கலைக்கழகம், அமெரிக்காவில் உள்ள கல்வி நிறுவனங்களுடனான தொடா்பு, மாணவா் பரிமாற்றத் திட்டங்கள், தொழில்நுட்பம், புதுமையான துறைகளில் கூட்டு ஆராய்ச்சி ஆகியவை குறித்து ஆலோசிக்கப்பட்டது.

இந்த சந்திப்பின்போது விஐடி துணைத் தலைவா் சேகா் விசுவநாதன், சா்வதேச உறவுகள் துறை இயக்குநா் ஆா்.சீனிவாசன் ஆகியோா் உடனிருந்தனா்.