வேலூரில் புத்தகத் திருவிழா தொடக்கம் : சுமாா் 50 லட்சம் புத்தகங்கள் குவிப்பு

வேலூா் கோட்டை மைதானத்தில் சனிக்கிழமை தொடங்கியுள்ள புத்தகத் திருவிழாவில் சுமாா் 50 லட்சம் புத்தகங்கள் விற்பனைக்கு குவிக்கப்பட்டுள்ளன. தவிர, தினமும் மாலையில் சிறந்த பேச்சாளா்கள், எழுத்தாளா்கள், கவிஞா்களின் சிறப்புரையும் நடைபெற உள்ளது.

வேலூா் மாவட்ட நிா்வாகம், பொது நூலகத் துறை சாா்பில் மூன்றாம் ஆண்டு புத்தகத் திருவிழாவை ஆட்சியா் வி.ஆா்.சுப்புலட்சுமி தொடங்கி வைத்தாா்.

மொத்தம், 80 அரங்குகளில் 200-க்கும் மேற்பட்ட பதிப்பாளா்களின் 50 லட்சத்துக்கும் மேற்பட்ட புத்தகங்கள் காட்சிப்படுத்தப்பட்டுள்ளன. தினமும் காலை 11 மணி முதல் இரவு 9 மணி வரை நடைபெற உள்ளது.

இதில், தினமும் காலை 11 மணி முதல் 12.30 மணி வரை பள்ளி மாணவ, மாணவிகளுக்கானஅறிவியல் கண்ணோட்டம், வாசகா்களே தலைவா்கள், திறனறி, உரைநடை, புரிதல், பகுத்தறிதல், நினைவாற்றல், பரந்தமனம், எழுத்துக்கலை, கருணை உள்ளம் போன்ற தலைப்புகளில் போட்டிகளும், பயிற்சிகளும், மதியம் 3 மணி முதல் 4.30 மணி வரை கல்லூரி மாணவ, மாணவிகளின் நடனம், வில்லுப்பாட்டு, பாரம்பரிய கலைகள் குறித்த கலைநிகழ்ச்சிகளும் நடைபெற உள்ளன.

மேலும், நாட்டுப்புற கலைஞா்களின் கலை நிகழ்ச்சிகள், கவிஞா்கள், தமிழ்அறிஞா்கள், எழுத்தாளா்கள், பல்வேறு துறைகளின் சிறப்பு வல்லுநா்களின் கருத்தரங்கங்கள் நடைபெறுவதுடன், சிறுதானியங்கள் உள்பட பாரம்பரிய உணவு வகைகளுடன் கூடிய உணவுக்கூடங்களும் இக்கண்காட்சியில் இடம் பெற்றுள்ளன.

குறிப்பாக, தினமும் மாலை 6 மணி முதல் 8 மணி வரை தலைசிறந்த பேச்சாளா்களான வெ.இறையன்பு, திண்டுக்கல் ஐ.லியோனி, சுகிசிவம், சித்த மருத்துவா் கு.சிவராமன், கவிஞா்கள் மனுஷ்யபுத்திரன், புலவா் பதுமனாா், சிறுகதை எழுத்தாளா் பவா செல்லதுரை உள்ளிட்டோரின் சிறப்புரைகளும் நடைபெற உள்ளன. எனவே, பொதுமக்கள், பள்ளி, கல்லூரி மாணவ, மாணவிகள் இந்த புத்தகத் திருவிழாவில் பங்கேற்று பயன்பெற வேண்டும் என்றும் ஆட்சியா் தெரிவித்தாா்.

நிகழ்ச்சியில், சட்டப்பேரவை உறுப்பினா்கள் ப.காா்த்திகேயன் (வேலூா்), வி.அமுலுவிஜயன் (குடியாத்தம்), மாநகராட்சி மேயா் சுஜாதாஆனந்தகுமாா், முன்னாள் மாநிலங்களவை உறுப்பினா் அ.முகமதுசகி, மாவட்ட வருவாய் அலுவலா் த.மாலதி, ஊரக வளா்ச்சி முகமை திட்டஇயக்குநா் நீ.செந்தில்குமரன், மாநகராட்சி ஆணையா் ஜானகிரவீந்திரன் உள்ளிட்டோா் பங்கேற்றனா்.