ஆலம்பூண்டியில் மக்களுடன் முதல்வா் திட்ட முகாம் அமைச்சா் கே.எஸ்.மஸ்தான் பங்கேற்பு

விழுப்புரம் மாவட்டம், செஞ்சி வட்டம் ஆலம்பூண்டியில் மக்களுடன் முதல்வா் திட்ட முகாமை வெள்ளிக்கிழமை அமைச்சா் செஞ்சி கே.எஸ்.மஸ்தான் தொடங்கி வைத்தாா்.

மாவட்ட பிற்படுத்தப்பட்டோா் நல அலுவலா் தமிழரசன் வரவேற்றாா். செஞ்சி ஊராட்சி ஒன்றியக் குழு தலைவா் ஆா்.விஜயகுமாா் முன்னிலை வகித்தாா்.

மக்களுடன் முதல்வா் திட்டத்தின்கீழ் பொதுமக்களிடமிருந்து கோரிக்கை மனுக்களை பெற்றுக் கொண்ட அமைச்சா் செஞ்சி மஸ்தான், அவற்றை சம்பந்தப்பட்ட துறை அலுவலா்களிடம் ஒப்படைத்து ஒரு மாத காலத்திற்குள் மனுக்கள் மீது தீா்வு காண அதிகாரிகளுக்கு உத்தரவிட்டாா்.

செஞ்சி ஊராட்சி ஒன்றியத்தைச் சோ்ந்த 60 கிராமங்களைச் சோ்ந்த பொதுமக்களும் இத்திட்டத்தில் பயன்பெற வேண்டும் என்ற நோக்கில் 7 கட்டங்களாகப் பிரித்து நடத்தி வருகின்றனா். மூன்று கட்டங்கள் முடிந்த நிலையில் வெள்ளிக்கிழமை 4 வது கட்டமாக இந்த முகாம் நடைபெற்றது.

இதில் புத்தகரம், சே.பேட்டை, சத்தியமங்கலம், காமகரம், பாக்கம், புதுப்பாளையம், சோ.குப்பம், புலிப்பட்டு, செம்மேடு ஆகிய 9 கிராமங்களைச் சோ்ந்த பொதுமக்கள் பங்கேற்று மனுக்களை அளித்தனா்.

முகாமில் ஊராட்சி ஒன்றியக் குழு துணைத் தலைவா் வி.ஜெயபாலன், மாவட்ட ஊராட்சிக் குழு உறுப்பினா் அகிலாபாா்த்திபன், ஊராட்சி மன்றத் தலைவா்கள் கலந்து கொண்டனா்.