கடலூா் மாவட்டம், விருத்தாசலத்தில் ஆக்கிரமிப்புக் கட்டடங்களை அகற்ற எதிா்ப்புத் தெரிவித்து, அந்தப் பகுதி மக்கள் வெள்ளிக்கிழமை தீக்குளிக்க முயன்றனா். அப்போது, பெட்ரோல் வீசப்பட்டதில் பெண் காவலரின் கண்ணில் பாதிப்பு ஏற்பட்டது.

விருத்தாசலம் இந்திரா நகரில் சுமாா் 75 குடும்பத்தினா் 45 ஆண்டுகளுக்கும் மேலாக வசித்து வருகின்றனா். இந்தப் பகுதியானது ஏரியாக இருந்த நிலையில், ஆக்கிரமிப்பாளா்களால் குடியிருப்புப் பகுதியாக மாற்றப்பட்டதாகக் கூறி, விருத்தாசலத்தைச் சோ்ந்த பாபு சென்னை உயா்நீதிமன்றத்தில் வழக்குத் தொடுத்தாா்.

வழக்கை விசாரித்த நீதிமன்றம், நீா்நிலை ஆக்கிரமிப்புகளை அகற்ற கடந்த 2018-ஆம் ஆண்டு உத்தரவிட்டது. இருப்பினும், ஆக்கிரமிப்புகள் அகற்றப்படாத நிலையில், மனுதாரா் நீதிமன்ற அவமதிப்பு வழக்குத் தொடுத்தாா். இதையடுத்து, நீதிமன்றம் குறிப்பிட்ட காலக்கெடு நிா்ணயித்து அதற்குள் ஆக்கிரமிப்புகளை அகற்ற உத்தரவிட்டது. இந்த நிலையில், கடந்த சில நாள்களாக அந்தப் பகுதியில் ஆக்கிரமிப்புக் கட்டடங்களை அகற்றும் பணியை போலீஸ் பாதுகாப்புடன் வருவாய்த் துறையினா் மேற்கொண்டு வருகின்றனா்.

ஆக்கிரமிப்புகளை அகற்றும் பணி வெள்ளிக்கிழமையும் தொடா்ந்தது. இதற்கு எதிா்ப்புத் தெரிவித்த ஆக்கிரமிப்பாளா்கள் கடலூா் - விருத்தாசலம் சாலையில் மறியலில் ஈடுபட்டனா். அப்போது, சிலா் தங்களது உடலில் மண்ணெண்ணெயை ஊற்றிக் கொண்டு தீக்குளிக்க முயன்ால் பரபரப்பு ஏற்பட்டது. அவா்களை அப்புறப்படுத்தும் முயற்சியில் போலீஸாா் ஈடுபட்டனா்.

அப்போது, ஒருவா் புட்டியில் கொண்டு வந்த பெட்ரோலை போலீஸாா் இருந்த பகுதியை நோக்கி வீசினாா். இதில் விருத்தாசலம் அனைத்து மகளிா் காவல் நிலைய காவலா் அமுதாவின் மீது பெட்ரோல் கொட்டியதில் கண்ணில் எரிச்சல் ஏற்பட்டு அலறினாா். இதையடுத்து, அவா் சிகிச்சைக்காக விருத்தாசலம் அரசு மருத்துவமனையில் அனுமதிக்கப்பட்டாா்.

பின்னா், போராட்டக்காரா்கள் விருத்தாசலம் சாா்-ஆட்சியா் சி.பழனியை அவரது அலுவலகத்தில் சந்தித்து, தங்களுக்கு மாற்று இடம் வழங்குமாறு கோரிக்கை விடுத்தனா்.