நிலத்தடி நீா் மாசடைவதை தடுக்க வேண்டும்: குடியிருப்போா் நலச் சங்கத்தினா் கோரிக்கை

நெய்வேலி: கடலூா் மாவட்டத்தில் நிலத்தடி நீா் மாசடைவதை விஞ்ஞானபூா்வமாக தடுக்க நடவடிக்கை எடுக்க வேண்டும் என்று குடியிருப்போா் நலச் சங்கம் வலியுறுத்தியது.

கடலூா் அனைத்து குடியிருப்போா் நலச் சங்க கடலூா் மாவட்டச் செயற்குழுக் கூட்டம் திங்கள்கிழமை நடைபெற்றது. தலைவா் முத்துவேல் தலைமை வகித்தாா்.

சிறப்புத் தலைவா் மருதவாணன், துணைத் தலைவா்கள் வேல்முருகன், பாலு பச்சையப்பன், துணைச் செயலா்கள் கலியமூா்த்தி, கோவிந்தராஜன் முன்னிலை வைத்தனா்.

செயலா் வெங்கடேசன் மாவட்டத்திலுள்ள மாநகராட்சி, நகராட்சிகள் மற்றும் பேரூராட்சிகளின் நிலவும் பிரச்சனைகளை எடுத்துரைத்தாா். செயற்குழு உறுப்பினா்கள் தேவநாதன், நடராஜன், ஆறுமுகம், சண்முகம், குப்புசாமி, பன்னீா்செல்வம் ஆகியோா் கலந்து கொண்டனா்.

அனைத்து நகராட்சிகள், பேரூராட்சிகளில் திடக்கழிவு மேலாண்மைக்கு அதிக நிதி ஒதுக்கி செயல்படுத்த வேண்டும். நகராட்சிப் பகுதிகளில் ஒருங்கிணைந்த வடிகால் வசதி ஏற்படுத்த வேண்டும்.

கடலூா் மாவட்ட கடற்கரை சுற்றுச்சூழல் சீா்கேடு இல்லாமல் பாதுகாக்கவும், ஆற்றின் முகத்துவாரம் வழியாக கடல் நீா் உள்புகுவதைத் தடுக்க வேண்டும். கடலூா் மாவட்டத்தில் நிலத்தடி நீா்மட்டம் குறைந்து, கடல் நீா் உள்புகுவது அதிகமாகி வருகிறது.

மேலும், தொழிற்சாலைகள் அபாயமான கழிவுகளை விடுவதால் நிலத்தடி நீா் மாசடைந்து வருகிறது. இதைத் தடுக்க விஞ்ஞானபூா்வமாக தடுக்க நடவடிக்கை எடுக்க வேண்டும். கடலூா் மாவட்ட ஆறுகளைப் பாதுகாக்க அரசும், மாவட்ட நிா்வாகமும் நடவடிக்கை எடுக்க வேண்டும்.

அனைத்து நகராட்சிகள், மாநகராட்சிப் பகுதிகளில் பழைய குடிநீா்க் குழாய்களை அகற்றி புதிய குடிநீா்க் குழாய்களை அமைத்து பாதுகாப்பான குடிநீா் வழங்க வேண்டும்.

மாநகராட்சியில் புதிய பேருந்து நிலையம் அமைப்பதற்கான தீா்மானத்தை ரத்து செய்து, ஆட்சியா் அலுவலகம் அருகிலும், தற்போதுள்ள பேருந்து நிலையம் தொடர தமிழக அரசு ஆணை பிறப்பித்து செயல்படுத்த வேண்டும். கடலூரில் தோ்வு செய்யப்பட்ட இடத்தில் மருத்துவக் கல்லூரி அமைக்க வேண்டும் என தீா்மானங்கள் நிறைவேற்றப்பட்டன.