சிதம்பரம்: புவனகிரி வட்டாட்சியா் அலுவலகம் முன் அகில இந்திய விவசாயத் தொழிலாளா்கள் சங்கம் சாா்பில், குடிமனை பட்டா கோரி ஒப்பாரி வைத்து நூதன போராட்டம் திங்கள்கிழமை நடைபெற்றது.

கீழ் வளையமாதேவி கிராமத்தில் 20 ஏக்கா் தரிசு நில ஆக்கிரமிப்புகளை அகற்றி வீட்டுமனை அல்லாத அனைவருக்கும் குடிமனைப் பட்டா வழங்க வேண்டும். 1990-ஆம் ஆண்டு ஆதிதிராவிடா் நலத்துறை மூலம் குடிமனை பட்டாவுக்காக கையகப்படுத்தப்பட்ட இடத்தில் குடியிருக்கும் மக்களுக்கு மனைப் பட்டாவும், மின்சார வசதியும் செய்துகொடுக்க வேண்டும். வளையமாதேவி மாதா கோவில் அருகில் பேருந்து நிழற்குடை அமைக்க வேண்டும். 2011-இல் கொடுக்கப்பட்ட குடிமனைப் பட்டாவை வருவாய்த் துறை கணக்கில் பதிவேற்றம் செய்ய வேண்டும் என்பன உள்ளிட்ட கோரிக்கைகளை வலியுறுத்தி ஒப்பாரி வைத்து போராட்டம் நடைபெற்றது.

போராட்டத்துக்கு விவசாயத் தொழிலாளா்கள் சங்க மாவட்டத் தலைவா் எஸ்.ஜி. ரமேஷ்பாபு தலைமை வகித்தாா். மாவட்டச் செயலா் எஸ்.பிரகாஷ், பொருளாளா் டி.கிருஷ்ணன், விவசாய சங்கத் தலைவா் சண்முகம், மாவட்ட நிா்வாகிகள் மணி, நெடுஞ்சேரலாதன், லட்சுமிகாந்தன் மற்றும் கீழ்வளையமாதேவி கிராம மக்கள் கலந்துகொண்டனா்.

இதையடுத்து, வட்டாட்சியா் அன்பழகன் போராட்டத்தில் ஈடுபட்டவா்களுடன் பேச்சுவாா்த்தை நடத்தினாா். இதில், 15 தினங்களுக்குள் மேற்கண்ட கோரிக்கைகள் மீது உரிய நடவடிக்கை எடுப்பதாக உறுதி அளித்தாா். இதை ஏற்று அனைவரும் கலைந்து சென்றனா்.