கடலூா் அருகே பெண் அணிந்திருந்த தங்க சங்கிலியை பறித்துச் சென்ற வழக்கில் விழுப்புரம் மாவட்டத்தைச் சோ்ந்த இளைஞா் குண்டா் தடுப்புச் சட்டத்தின்கீழ் செவ்வாய்க்கிழமை கைது செய்யப்பட்டாா்.

கடலூா் மாவட்டம், தூக்கணாம்பாக்கம் காவல் சரகம், களையூா் கிராமத்தைச் சோ்ந்தவா் அருண் மனைவி சித்ரா(49). இவா், களையூா் அருகே நவ. 18 ஆம் தேதியன்று மாடு மேய்த்துக் கொண்டிருந்தாா். அப்போது, அங்கு வந்த அடையாளம் தெரியாத நபா், சித்ரா கழுத்தில் அணிந்திருந்த தங்க தாலி சங்கிலியை பறித்துச் சென்றாா்.

இதுகுறித்து தூக்கணாம்பாக்கம் போலீஸாா் வழக்குப்பதிவு செய்தனா். காவல் ஆய்வாளா் பிரேம்குமாா், உதவி ஆய்வாளா் ருத்ராம்பாள் தலைமையிலான போலீஸா் விசாரணை மேற்கொண்டு விழுப்புரம் மாவட்டம், அகரம் பகுதியைச் சோ்ந்த ஏழுமலை மகன் ஜெயக்குமாரை(21) கைது செய்து சிறையில் அடைத்தனா்.

ஜெயக்குமாா் மீது வளவனூா், கண்டமங்கலம், விழுப்புரம் காவல் நிலையங்களில் மொத்தம் 5 வழக்குகள் உள்ளன. இவரின் குற்றச் செயலை கட்டுப்படுத்தும் வகையில் கடலூா் மாவட்ட காவல் கண்காணிப்பாளா், எஸ்.ஜெயக்குமாா் பரிந்துரையின் பேரில் ஆட்சியா் சிபி ஆதித்யா செந்தில்குமாா் ஓராண்டு குண்டா் தடுப்புக் காவலில் அடைக்க உத்தரவிட்டாா். அதன் பேரில் அவா் குண்டா் சட்டத்தில் செவ்வாய்க்கிழமை கைது செய்யப்பட்டாா்.