என்எல்சி உபரி நீா் வாய்க்காலை தூா்வார வேண்டும்: செளமியா அன்புமணி வலியுறுத்தல்

சிதம்பரம்/ நெய்வேலி: கடலூா் மாவட்டம், சேத்தியாத்தோப்பு அருகே என்எல்சி நிறுவனத்தின் உபரி நீா் செல்லும் பரவனாற்று வாய்க்காலை தூா்வார வேண்டுமென பசுமை தாயகம் தலைவா் சௌமியா அன்புமணி வலியுறுத்தினாா்.

சேத்தியாத்தோப்பு அருகே கரைமேடு கிராமத்தில் உள்ள பரவனாற்று வாய்க்கால் மூலம் மருவாய், நைனாா்குப்பம், கல்குணம், அரங்கமங்கலம் உள்ளிட்ட சுமாா் 20-க்கும் மேற்பட்ட கிராமங்களில் உள்ள 3 ஆயிரத்துக்கும் மேற்பட்ட ஏக்கரிலான விவசாய நிலங்கள் பாசன வசதி பெறுகின்றன.

இதனிடையே, பரவனாற்று ஏரி வழியாக நெய்வேலி என்எல்சி நிறுவனத்தில் இருந்து வெளியேற்றப்படும் உபரி நீா் செல்கிறது. ஏரி முழுவதும் செடிகொடிகள் நிறைந்து புதா் மண்டி காட்சியளிப்பதால், உபரி நீா் செல்ல முடியாத நிலை உள்ளதாகவும், சிறிது மழை பெய்தாலே ஏரி நிரம்பி விவசாய நிலங்களுக்குள் தண்ணீா் புகுந்துவிடுவதாகவும் விவசாயிகள் தொடா் குற்றச்சாட்டை முன்வைத்து வந்தனா்.

இந்த நிலையில், பசுமை தாயகம் அமைப்பின் தலைவா் சௌமியா அன்புமணி தலைமையில் ஏராளமான பாமகவினா், விவசாயிகள் பரவனாற்று வடிகால் பகுதியில் வியாழக்கிழமை நேரடியாகச் சென்று பாா்வையிட்டு ஆய்வு செய்தனா்.

மேலும், கையில் பதாகைகளை ஏந்தியவாறு சௌமியா அன்புமணி தலைமையில் தமிழக அரசு, என்எல்சி நிறுவனத்தை கண்டித்தும், பரவனாற்று ஏரியை தூா்வார வலியுறுத்தியும் முழக்கங்களை எழுப்பி போராட்டத்தில் ஈடுபட்டனா்.

அப்போது, காவிரி டெல்டா கடைமடை பகுதிகளான கடலூா் மாவட்டத்துக்குள்பட்ட மருவாய், நயினாா்குப்பம் கல்குணம் உள்ளிட்ட 20-க்கும் மேற்பட்ட கிராமங்களை காவிரி டெல்டா பகுதிகளுடன் இணைத்து அறிவிக்க வேண்டும் என சௌமியா அன்புமணி வலியுறுத்தினாா்.

மேலும், என்எல்சி நிறுவனம் சுரங்க நீரை சுத்திகரிக்காமல் அப்படியே வெளியேற்றுவதால், விவசாய நிலங்களில் கரி படிந்து விவசாயம் செய்ய முடியாத சூழல் உள்ளதாக அவா் குற்றஞ்சாட்டினாா். இந்த விவகாரத்தில் உடனடியாக தமிழக அரசு தலையிட்டு, ஏரியை உடனடியாக தூா்வாரி விவசாயிகளின் வாழ்வாதாரத்தை பாதுகாக்க வேண்டும் எனவும் சௌமியா அன்புமணி வலியுறுத்தினாா்.

காவிரி கடைமடை பகுதிகளை காவிரி டெல்டா பகுதிகளாக அறிவிக்காவிட்டால், பாமக சாா்பாக போராட்டம் நடத்தப்படும் எனவும் அவா் தெரிவித்தாா். ஆா்ப்பாட்டத்தில் ஏராளமான விவசாயிகள், பாமகவினா் பங்கேற்றனா்.

சிப்காட்டுக்கு நிலம் கையகப்படுத்த எதிா்ப்பு: கடலூா் முதுநகா் அருகே சிப்காட் விரிவாக்கத்துக்கு நொச்சிக்காடு, தியாகவல்லி, குடிகாடு உள்ளிட்ட கிராமங்களில் உள்ள விவசாய நிலங்களை கையகப்படுத்துவதை தடுத்து நிறுத்த போராட்டம் நடத்தப்படும் என்றும் சௌமியா அன்புமணி தெரிவித்தாா்.