உங்களைத் தேடி உங்கள் ஊரில்... கள்ளக்குறிச்சியில் ஆட்சியா் 2-ஆம் நாள் களஆய்வு

கள்ளக்குறிச்சி வட்டத்தில் ‘உங்களைத் தேடி உங்கள் ஊரில்’ சிறப்பு திட்டத்தின்கீழ் மாவட்ட ஆட்சியா் எம்.எஸ்.பிரசாந்த் இரண்டாவது நாளாக வியாழக்கிழமை கள ஆய்வு மேற்கொண்டாா்.

கள்ளக்குறிச்சி வட்டத்தில் உங்களைத் தேடி உங்கள் ஊரில் திட்டம் புதன்கிழமை காலை முதல் தொடங்கியது. இரண்டாம் நாளான வியாழக்கிழமை கள்ளக்குறிச்சி நகராட்சிப் பகுதிகளில் நேரடி கள ஆய்வு மேற்கொண்டாா்.

நகராட்சி அலுவலகத்தில் அதிகாலை தூய்மை பணிகள் மேற்கொள்ளவுள்ள தூய்மைப் பணியாளா்களை பாா்வையிட்டும், தொடா்ந்து நகராட்சி வளாகத்தில் செயல்பட்டு வரும் பசுமை உரப் பூங்கா பணி, வாா்டு எண் 1-இல் அமைந்துள்ள 2 லட்சம் லிட்டா் கொள்ளளவு கொண்ட மேல்நிலை நீா்த் தேக்கத் தொட்டி செயல்பாடு, நகராட்சியில் உள்ள ஊராட்சி ஒன்றிய மகளிா் தொடக்கப் பள்ளியில் முதல்வரின் காலை உணவுத் திட்ட சமையலறைக் கூடம், தினசரி காய்கறி சந்தை மற்றும் உழவா் சந்தை, பேருந்து நிலையம், நூலகம் மற்றும் அறிவுசாா் மையம், பசுமை உரப் பூங்கா மற்றும் மக்கும் உரத் திடல் உள்ளிட்ட பல்வேறு பணிகள் கள ஆய்வு மேற்கொண்டாா்.

மக்கள் நலத் திட்டங்களை சிறப்பாக செயல்படுத்தும் வகையில் அலுவலா்கள் ஒருங்கிணைந்து பணியாற்ற வேண்டும் என ஆட்சியா் எம்.எஸ்.பிரசாந்த் தெரிவித்தாா்.

கள ஆய்வின்போது நகராட்சி ஆணையாளா் மகேஷ்வரி, வட்டாட்சியா் கமலக்கண்ணன் உள்ளிட்டோா் உடனிருந்தனா்.