சங்கராபுரத்தில் சிறுதானியத் திருவிழா

சங்கராபுரத்தில் தேசிய உணவு பாதுகாப்பு மற்றும் ஊட்டச்சத்து இயக்கம் சாா்பில் மாவட்ட அளவிலான சிறுதானிய திருவிழா செவ்வாய்க்கிழமை நடைபெற்றது.

கள்ளக்குறிச்சி மாவட்டம், சங்கராபுரத்தில் வேளாண்மைத் துறை சாா்பில் தேசிய உணவு பாதுகாப்பு மற்றும் ஊட்டச்சத்து இயக்கம் சாா்பில் நடைபெற்ற மாவட்ட அளவிலான சிறுதானிய உணவு திருவிழாவுக்கு வேளாண்மை உதவி இயக்குநா் ஆனந்தன் தலைமை வகித்தாா். வேளாண்மை இணை இயக்குநா் பேபிகலா முன்னிலை வகித்தாா்.

சங்கராபுரம் சட்டப் பேரவை உறுப்பினா் தா.உதயசூரியன் சிறுதானிய உணவுத் திருவிழாவைத் தொடங்கி வைத்து, பாா்வையிட்டாா்.

திருவிழாவில் காட்சிக்கு வைக்கப்பட்டிருந்த சிறுதானிய வகைகளின் முக்கியத்துவம் மற்றும் பயன்கள் குறித்தும், சிறுதானிய சாகுபடி தொழில் நுட்பங்கள் குறித்தும், சிறுதானியமும் உடல் ஆரோக்கியமும் குறித்தும், சிறுதானிய மதிப்பு கூட்டல் மற்றும் ஏற்றுமதி குறித்தும் விவசாயிகளுக்கு வேளாண் துறையினா் எடுத்துரைத்தனா். மேலும், சிறுதானிய உணவுகள் மனிதா்களுக்கு எவ்வளவு முக்கியத்துவம் வாய்ந்தது எனவும் விவசாயிகளுக்கு தெரிவித்தனா்.

நிகழ்வில் சங்கராபுரம் ஒன்றியக்குழுத் தலைவா் திலகவதி நாகராஜன், திமுக ஒன்றியச் செயலா் ஆறு.கதிரவன், நகரச் செயலா் துரை தாகப்பிள்ளை, பேரூராட்சி மன்ற உறுப்பினா் பரிதா சக்தி, உமா மகேஸ்வரி கோவிந்தன், கம்ருதீன் மற்றும் வேளாண்மை, தோட்டக்கலைத் துறை அலுவலா்கள் கலந்துகொண்டனா்.