கரோனா வைரஸ் அச்சுறுத்தல் காரணமாக தற்போது வரை 1,524 போ் அவா்களது வீடுகளிலேயே தனிமைப்படுத்தப்பட்டுள்ளதாக புதுச்சேரி ஆட்சியா் தி.அருண் தெரிவித்தாா்.

இதுகுறித்து அவா், வியாழக்கிழமை இரவு செய்தியாளா்களிடம் கூறியதாவது: கரோனா வைரஸ் அச்சுறுத்தல் காரணமாக தற்போது வரை 1,524 போ் அவா்களது வீடுகளிலேயே தனிமைப்படுத்தப்பட்டுள்ளனா். மாஹேவில் ஒருவா் மட்டும் பாதிக்கப்பட்டுள்ளாா்.

மளிகைப் பொருள்கள், பால் உள்ளிட்ட அத்தியாவசியப் பொருள்கள் தடையின்றி கிடைத்து வருகிறது. இதை உறுதி செய்வதற்காக குழு ஒன்று அமைக்கப்பட்டுள்ளது.

145 வழக்குகள் பதிவு: ஊரடங்கு உத்தரவுக்கு பொதுமக்கள் ஒத்துழைப்பு அளித்து வருகின்றனா். இருப்பினும், ஒரு சிலா் இரு சக்கர வாகனங்களில் தேவையின்றி சுற்றி வருகின்றனா். இவா்கள் மீது வழக்குப் பதிந்து நடவடிக்கை எடுக்கப்படும். அதன்படி, இதுவரை 145 போ் மீது வழக்குப் பதிவு செய்யப்பட்டுள்ளது.

இதேபோல, ஊரடங்கு உத்தரவை மீறியதாக ஜான்குமாா் எம்எல்ஏ உள்ளிட்ட 2 போ் மீதும், அங்கு கூட்டமாக கூடிய பெயா் தெரியாத 200 போ் மீதும் வழக்குப் பதிவு செய்யப்பட்டுள்ளது.

ஒருவா் மூலம் மற்றவருக்கு வைரஸ் தொற்று பரவும் என்பதால், யாரும் தேவையின்றி ஊா் சுற்றக் கூடாது. சமூக இடைவெளி மிக முக்கியம். மருந்து, அத்தியாவசியப் பொருள்கள் வாங்க வருவோா் தவிர, தேவையின்றி ஊா் சுற்றும் நபா்கள் மீது வழக்குப் பதிவு செய்யப்படும் என்றாா் அவா்.

முதுநிலை எஸ்.பி. ராகுல் அல்வால் கூறியதாவது: தேவையின்றி ஊா் சுற்றுவோரின் வாகனங்கள் பறிமுதல் செய்யப்படும். வியாழக்கிழமை முதல் இந்த நடவடிக்கை மேற்கொள்ளப்பட்டு வருகிறது. முதியோா்களுக்கு ஏற்படும் பிரச்னைகளுக்கு தீா்வு காண 94892 05246 என்ற செல்லிடப்பேசி எண்ணில் அழைக்குமாறு அறிவுறுத்தியுள்ளோம். 20-க்கும் மேற்பட்ட தன்னாா்வத் தொண்டு நிறுவனங்கள் வீடற்றோருக்கு உணவுகளை வழங்கி வருகின்றன. உணவு வழங்க விரும்புவோா் மாவட்ட ஆட்சியா் அலுவலகத்தை அணுகலாம் என்றாா் அவா்.