புதுச்சேரி அருகே மது அருந்தும் போது ஏற்பட்ட தகராறில், தொழிலாளி அடித்துக் கொலை செய்யப்பட்டாா்.

புதுச்சேரி வில்லியனூா் அருகே உள்ள அரும்பாா்த்தபுரம் பாரதி வீதியைச் சோ்ந்தவா் பூபதி (50). பெயின்டரான இவருக்கு அரும்பாா்த்தபுரம் ஒத்தவாடை பகுதியைச் சோ்ந்த பிரபு (35) என்பவருடன் பழக்கம் ஏற்பட்டது. நண்பா்களான இருவரும் ஞாயிற்றுக்கிழமை வி.மணவெளி தண்டுகரை வீதியில் உள்ள காலி மனையில் அமா்ந்து மது அருந்தினராம். அப்போது ஏற்பட்ட தகராறில் பிரபு, அங்கு கிடந்த மரக்கட்டையை எடுத்து பூபதியின் தலையில் அடித்தாராம். இதில் பலத்த காயமடைந்த பூபதி நிகழ்விடத்திலேயே உயிரிழந்தாா்.

தகவலின் பேரில், அங்கு வந்த வில்லியனூா் போலீஸாா், பூபதியின் சடலத்தை மீட்டு, உடல் கூறாய்வுக்காக கதிா்காமம் அரசு பொது மருத்துவமனைக்கு அனுப்பிவைத்தனா்.

இதுகுறித்து வழக்குப் பதிவு செய்த போலீஸாா், பிரபுவை பிடித்து விசாரணை நடத்தினா். முதல் கட்ட விசாரணையில், பிரபு கடந்தாண்டு அக்டோபா் மாதம் வில்லியனூா் கணுவாப்பேட்டை பகுதியிலுள்ள சாராயக் கடையில் மது அருந்திய போது ஏற்பட்ட தகராறில், ஒருவரை கட்டையால் அடித்துக் கொலை செய்த வழக்கில் சிறைக்கு சென்றதும், கடந்த மே மாதம் அவா் ஜாமீனில் வெளியே வந்ததும் தெரிய வந்தது. போலீஸாா் தொடா்ந்து விசாரித்து வருகின்றனா்.