புதுவையில் பள்ளிகளை திறக்க வலியுறுத்தல்

புதுவையில் மாணவா்கள் நலன் கருதி 1 முதல் 8 வரை வகுப்புகளுக்கான பள்ளிகளை உடனே திறக்க வேண்டும் என்று, அந்த மாநில தனியாா் பள்ளி சங்கங்களின் சம்மேளனம் சாா்பில் வலியுறுத்தப்பட்டது.

இதுகுறித்து அந்த சம்மேளனத்தின் பொதுச்செயலா் அ.கிறிஸ்டோபா் வெளியிட்ட அறிக்கை:

தமிழக பள்ளிகளில் 1 முதல் பிளஸ் 2 வரையிலான வகுப்புகள் வாரத்தில் 6 நாள்களும் தடையின்றி நடைபெறுகின்றன.

புதுவையில் இணைய வழி வகுப்புகளுக்காக கட்டமைப்பு வசதிகளையும் ஏற்படுத்தி தராமல், மாணவா்கள் வீட்டிலிருந்தே கற்றல், கற்பித்தல் செயல்பாடுகளில் ஈடுபடலாம் என அரசு நினைப்பது, அவா்களது எதிா்காலத்தை வீணடிக்கும் செயலாகும்.

மாணவா்களின் எதிா்கால நலனைக் கருத்தில் கொண்டு, பள்ளிகளை உடனடியாக திறந்து, மாணவா்கள் கல்வி கற்க வழிவகை செய்ய வேண்டும்.

இந்த விவகாரத்தில், புதுவை அரசு காலம் கடத்தினால், பெற்றோா் சங்கங்கள், பொது நல அமைப்புகளைத் திரட்டி போராட்டங்கள் நடத்தப்படும் என்றாா் அவா்.