பாண்டி மெரினா கடற்கரை பாறை இடுக்கில் சிக்கிய உதவிப் பேராசிரியை கிரேன் உதவியுடன் சனிக்கிழமை இரவு மீட்கப்பட்டாா்.

மதுரையைச் சோ்ந்தவா் வைஷ்ணவி(25). சென்னையில் தங்கி கல்லூரி ஒன்றில் மனநல உதவி பேராசிரியையாகப் பணியாற்றி வருகிறாா். இவா் தோழிகளுடன் புதுச்சேரிக்கு சுற்றுலா வந்துள்ளாா். பல்வேறு இடங்களை சுற்றிப்பாா்த்துள்ளனா்.

இந்நிலையில் சனிக்கிழமை மாலை வைஷ்ணவி உள்ளிட்டோா் பாண்டி மெரினா கடற்கரைக்குச் சென்றுள்ளனா். அங்குள்ள பாறைகளின் மீது நின்று கைப்பேசியில் ரீல்ஸ் எடுத்ததாகக் கூறப்படுகிறது. அப்போது எதிா்பாராதவிதமாக வைஷ்ணவி கால் இடறி பாறை இடுக்கில் விழுந்து சிக்கிக்கொண்டாா்.

இதனைக்கண்டு உடன் வந்தவா்கள் கூச்சலிட்டனா். இது குறித்து ஒதியஞ்சாலை போலீஸாா் மற்றும் தீயணைப்பு நிலையத்துக்கு தகவல் தெரிவிக்கப்பட்டது. விரைந்து வந்த காவல் ஆய்வாளா் செந்தில்குமாா் தலைமையிலான போலீஸாா் மற்றும் தீயணைப்பு வீரா்கள் வம்பாகீரப்பாளையம் இளைஞா்கள் உதவியுடன் கயிறுகட்டி வைஷ்ணவியை மீட்க முயன்றனா்.

சுமாா் அரை டன் எடை கொண்ட பாறை என்பதால் உடனே அவரை மீட்க முடியவில்லை. இதையடுத்து பேரிடா் மீட்புத் துறைக்கு தகவல் தெரிவிக்கப்பட்டு ராட்சத கிரேன் வரவழைக்கப்பட்டது. அதன் பின்னா் பாறை நகா்த்தப்பட்டு உதவி பேராசிரியை வைஷ்ணவி பத்திரமாக மீட்கப்பட்டாா்.

இதில் அவருக்கு கால், இடுப்பு உள்ளிட்ட இடங்களில் காயம் ஏற்பட்ட நிலையில் அருகிலுள்ள புதுச்சேரி அரசு பொது மருத்துவமனைக்கு அவா் கொண்டு செல்லப்பட்டு சிகிச்சை பெற்று வருகிறாா். இது குறித்து ஒதியஞ்சாலை போலீஸாா் விசாரணை நடத்தி வருகின்றனா்.