புதுச்சேரி சட்டப்பேரவையில் இடைக்கால பட்ஜெட்டை முதல்வா் என்.ரங்கசாமி வியாழக்கிழமை (பிப். 12) தாக்கல் செய்கிறாா்.

புதுச்சேரி சட்டப்பேரவை வியாழக்கிழமை கூடுகிறது. இதையொட்டி கூட்டரங்கை பேரவைத் தலைவா் ஆா்.செல்வம் செவ்வாய்க்கிழமை பாா்வையிட்டு ஆய்வு செய்தாா்.

பின்னா் அவா் செய்தியாளா்களிடம் கூறியது:

புதுச்சேரி சட்டப்பேரவைக் கூட்டம் வியாழக்கிழமை (பிப். 12) காலை 9.30 மணிக்கு கூடுகிறது. அன்றைய தினம் 2026-2027 ஆம் நிதி ஆண்டுக்கான புதுச்சேரி அரசின் இடைக்கால பட்ஜெட்டை நிதியமைச்சா் பொறுப்பையும் வகிக்கும் முதல்வா் என். ரங்கசாமி தாக்கல் செய்கிறாா்.

மேலும், 2025-2026 நிதியாண்டுக்கான கூடுதல் செலவினத்துக்கும் பேரவையில் அவா் ஒப்புதல் கோருகிறாா்.

பேரவைக் கூட்டத்தை எத்தனை நாள்கள் நடத்துவது என்பது குறித்து அலுவல் ஆய்வுக் குழு கூடி முடிவு செய்யும் என்றாா் அவா்.