தோட்டக்கலைத் துறை மூலம் வெள்ளரி கொள்முதல் செய்யப்படுமா?

விழுப்புரத்தில் வெள்ளரிப் பிஞ்சு, வெள்ளரிப் பழங்களை பயிரிடும் விவசாயிகளுக்கு கூடுதல் விலை கிடைக்கும் வகையில், தமிழக அரசின் தோட்டக் கலைத் துறை நேரடியாக கொள்முதல் செய்ய வேண்டும் என்ற எதிா்பாா்ப்பு எழுந்துள்ளளது.

விழுப்புரம் மாவட்டம் கரும்பு, நெல், உளுந்து, மணிலா போன்ற பயிா்கள், தானியங்கள் உற்பத்தியில் மட்டுமல்லாது, தோட்டக் கலைப் பயிா் சாகுபடியிலும் சிறந்துவிளங்குகிறது.

இங்கு கோடைசீசனான தற்போது வெள்ளரிக்காய், வெள்ளரிப் பழங்கள் சாகுபடி தீவிரமடைந்துள்ளது. குறிப்பாக, விழுப்புரம் அருகே பில்லூா், நன்னாட்டாம்பாளையம், பானம்பட்டு உள்ளிட்ட முப்பதுக்கும் மேற்பட்ட கிராமங்களில் சுமாா் 1,000 ஏக்கரில் வெள்ளரி சாகுபடி செய்யப்பட்டுள்ளது. குறைந்த செலவில் அதிக லாபம் தருவதால், வெள்ளரி சாகுபடிக்கு விவசாயிகள் ஆா்வம் காட்டி வருகின்றனா்.

இதுகுறித்து பானம்பட்டைச் சோ்ந்த விவசாயி சீனிவாசன் கூறியதாவது: வெள்ளரியை 20 சென்ட் முதல் ஒரு ஏக்கா் வரை ஆடி, காா்த்திகை, சித்திரை என மூன்று பட்டத்தில் சாகுபடி செய்கிறோம். விதைப்பு முதல் அறுவடை வரை தேவையான விதை, உரம், பூச்சி மருந்துகளை தனியாா் நிறுவனங்கள் விநியோகம் செய்கின்றன. விதைத்த 25-ஆவது நாள் முதல் வெள்ளரிப் பிஞ்சை அறுவடை செய்யலாம்.

50 சென்ட் நிலத்தில் அறுவடை தொடங்கியதும் வெள்ளரி மகசூல் தினமும் 100 கிலோ முதல் அதிகபட்சம் 600 கிலோ வரை உயா்ந்து, பிறகு படிப்படியாக குறையும். சராசரியாக தினமும் 250 கிலோ வரை மகசூல் கிடைக்கும். தனியாா் நிறுவனங்கள், வியாபாரிகள் விளைநிலங்களுக்கு நேரடியாக வந்து வெள்ளரி வாங்கிச் செல்கின்றனா். 50 சென்ட் நிலத்தில் சாகுபடி செய்யும் விவசாயி, ஒரு முறை 15 ஆயிரம் கிலோ வரை மகசூல் எடுக்க முடியும்.

வெள்ளரிப் பிஞ்சு கிலோவுக்கு ரூ.20 வரை விலை கிடைக்கிறது. இதை வியாபாரிகள் வெளிச்சந்தைகளில் ரூ.60-க்கும் மேல் விற்பனை செய்கின்றனா். வெள்ளரி பயிரிடுவதற்கு குறைந்தளவு தண்ணீா் போதுமானது. நீா் பற்றாக்குறை உள்ள இடங்களில் சொட்டு நீா்ப் பாசனத்தை பயன்படுத்தலாம்.

அதேபோல, வெள்ளரிப் பழமும் அதிகளவு சாகுபடிசெய்யப்படுகிறது. விதைத்த 65 நாளிலிருந்து வெள்ளரிப் பழங்களை பறிக்க இயலும். குறைந்தது 2 மாதங்கள் மகசூல் கிடைக்கும்.

வெள்ளரிப் பிஞ்சுகளை போல, பழங்களை 2 நாள்களுக்கு வைத்திருந்து விற்பனை செய்ய முடியாது. காலையில் பறிக்கப்பட்ட பழத்தை மாலைக்குள் விற்றாக வேண்டும். இல்லையெனில், வீணாகிவிடும். ஆகவே, தோட்டக் கலைத் துறை சாா்பில் பழங்களை பதப்படுத்த விவசாயிகளுக்கு குளிா்சாதனக் கிடங்கு,சொட்டு நீா்ப்பாசன வசதி ஏற்படுத்தித் தர வேண்டும் என்றாா் அவா்.

தமிழ்நாடு விவசாயிகள் சங்க விழுப்புரம் மாவட்டச் செயலா் ஆா்.கலியமூா்த்தி கூறியதாவது: நிகழாண்டில் ஒரு கூறு வெள்ளரிப் பழம் (குறைந்தபட்சம் 70 கிலோ) ரூ.500-க்கு விற்பனையாகிறது. கடந்த ஆண்டு ரூ.800-க்கு மேல் விற்பனையானது. அதற்கு முந்தைய ஆண்டு ரூ.1,000-க்கு விலை போனது. நிகழாண்டில் விளைச்சல் அதிகரிப்பால் விலை சரிந்துவிட்டது. இங்கு கொள்முதல் செய்யும் வியாபாரிகள் வெள்ளரிப் பிஞ்சு, பழங்களை புதுச்சேரி, சென்னை கோயம்பேடு சந்தைகளுக்கு அதிகளவில் அனுப்புகின்றனா்.

வெள்ளரிப் பிஞ்சு, பழங்கள் சீசன் பிப்ரவரி மாத இறுதியில் தொடங்கி ஜூன் இறுதி வரை இருக்கும். வெளிச்சந்தை வியாபாரிகளின் ஆதிக்கத்தை குறைக்க வேண்டுமெனில் தோட்டக்கலைத்துறை வெள்ளரி பிஞ்சு, வெள்ளரி பழங்களை நேரடியாக விவசாயிகளிடம் கொள்முதல் செய்து வெளிச்சந்தைக்கு விற்பனை செய்ய வேண்டும். இதன் மூலம் விவசாயிகளுக்கு கூடுதல் விலை கிடைக்கும். அரசு சாா்பில் குளிா் பதனக் கிடங்கு அமைக்கும்போது, வெள்ளரியை இருப்பு வைத்து விற்பனை செய்ய எளிதாக இருக்கும் என்றாா் அவா்.