கருணாநிதி நினைவு நாள்: திமுகவினா் மரியாதை

தமிழக முன்னாள் முதல்வா் கருணாநிதியின் மூன்றாமாண்டு நினைவு நாளையொட்டி, விழுப்புரம், கடலூா், திருவண்ணாமலை மாவட்டங்களில் திமுக சாா்பில், அவரது சிலைகள், உருவப்படங்களுக்கு சனிக்கிழமை மாலை அணிவித்து, மரியாதை செலுத்தப்பட்டது. மேலும், பொதுமக்களுக்கு நல உதவிகளும் வழங்கப்பட்டன.

விழுப்புரம் மத்திய மாவட்ட திமுக சாா்பில், விழுப்புரம் நகர அக்கட்சி அலுவலகத்திலிருந்து மாநில உயா் கல்வித் துறை அமைச்சா் க.பொன்முடி தலைமையில் திமுகவினா் பேரணியாக மாவட்ட கட்சி அலுவலகம் வரை சென்றனா். அங்கு, கருணாநிதியின் திருவுருவுவச் சிலைக்கு அமைச்சா் பொன்முடி மாலை அணிவித்து, மரியாதை செலுத்தினா்.

நிகழ்ச்சியில் மாவட்டச் செயலா் நா.புகழேந்தி எம்எல்ஏ, விழுப்புரம் எம்எல்ஏ இரா.லட்சுமணன், மாவட்ட அவைத் தலைவா் ஜெயச்சந்திரன், பொருளாளா் ஜனகராஜ், மாவட்ட தொமுச நியாயவிலைக் கடை ஊழியா்கள் சங்கத் தலைவா் ஸ்ரீதா், ஒன்றியச் செயலா் கல்பட்டு ராஜா உள்ளிட்டோா் பங்கேற்றனா்.

விழுப்புரம் நகராட்சிக்குள்பட்ட ராகவன்பேட்டை கிராமத்தில் 41-ஆவது வாா்டு திமுக சாா்பில் நடைபெற்ற நிகழ்ச்சியில், விழுப்புரம் எம்எல்ஏ இரா.லட்சுமணன் பங்கேற்று கருணாநிதி உருவப்படத்துக்கு மாலை அணிவித்து, மரியாதை செலுத்தினாா். மேலும், 200 பேருக்கு அவா் அன்னதானம் வழங்கினாா். நிகழ்ச்சியில் திமுக நகரச் செயலா் சா்க்கரை, வாா்டு செயலா் பாவாடை உள்ளிட்டோா் பங்கேற்றனா்.

மாவட்ட நீதிமன்ற அலுவலகம் அருகே திமுக வழக்குரைஞா் அணி சாா்பில், வழக்குரைஞரும், காணை ஒன்றிய திமுக செயலருமான கல்பட்டு ராஜா தலைமையில், கருணாநிதி உருவப்படத்துக்கு மாலை அணிவித்து, மரியாதை செலுத்தப்பட்டது.