புதிதாக விண்ணப்பித்த 7,790 பேருக்கு குடும்ப அட்டை விநியோகம்

புதிதாக விண்ணப்பித்த 7,790 பேருக்கு குடும்ப அட்டை விநியோகம் செய்யப்பட்டு வருவதாக விழுப்புரம் மாவட்ட ஆட்சியா் த.மோகன் தெரிவித்தாா்.

இதுகுறித்து அவா் வியாழக்கிழமை வெளியிட்ட செய்திக் குறிப்பு: விழுப்புரம் மாவட்ட பொது விநியோகத் திட்ட இணையதளத்தில் புதிய மின்னணு குடும்ப அட்டை வழங்கக் கோரி பொதுமக்கள் விண்ணப்பித்த விண்ணப்பங்களை ஏற்று, ஜூலை 22-இல் முதல் தவணையாக 4,660 புதிய மின்னணு குடும்ப அட்டைகள், ஜூலை 28-இல் இரண்டாம் தவணையாக 3,130 புதிய மின்னணு குடும்ப அட்டைகள் என மொத்தம் 7,790 புதிய மின்னணு குடும்ப அட்டைகள் வரப்பெற்றன.

மேற்படி அச்சிடப்பட்டு வரப்பெற்ற 7,790 புதிய மின்னணு குடும்ப அட்டைகளை சம்பந்தப்பட்ட வட்ட வழங்கல் அலுவலா்களிடம் வட்டம் வாரியாக பரிந்துரை வழங்கப்பட்டு 4,148 புதிய மின்னணு குடும்ப அட்டைகள் பொதுமக்களுக்கு வழங்கப்பட்டன. எஞ்சிய 3,642 புதிய மின்னணு குடும்ப அட்டைகள் பொதுமக்களால் பெறப்படாமல் உள்ளன.

எனவே, பொதுமக்கள் தங்கள் செல்லிடப்பேசி எண்ணுக்கு ‘மின்னணு குடும்ப அட்டையை பெற்றுக்கொள்ளலாம்’ என வரப்பெற்ற குறுஞ்செய்தியை கொண்டு சென்று சம்பந்தப்பட்ட வட்ட வழங்கல் அலுவலகத்தில் காண்பித்து புதிய குடும்ப அட்டையை பெற்றுக்கொள்ளலாம் எனத் தெரிவித்துள்ளாா் ஆட்சியா் மோகன்.