பேருந்து, ரயில் நிலையங்களில் போலீஸாா் தீவிர சோதனை

நாட்டின் 75-ஆவது சுதந்திர தினத்தையொட்டி, விழுப்புரம் பேருந்து நிலையம், ரயில் நிலையத்தில் மோப்ப நாய் உதவியுடன் போலீஸாா் வெள்ளிக்கிழமை தீவிர சோதனையில் ஈடுபட்டனா்.

கரோனா தடுப்பு விதிகளை பின்பற்றி, விழுப்புரம் மாவட்டத்தில் சுதந்திர தின விழா ஞாயிற்றுக்கிழமை கொண்டாடப்படவுள்ளது. விழுப்புரத்தில் பெருந்திட்ட வளாக காவலா் அணி வகுப்பு மைதானத்தில் நடைபெறும் விழாவில் மாவட்ட ஆட்சியா் த.மோகன் தேசியக் கொடியை ஏற்றி வைத்து நலத்திட்ட உதவிகளை வழங்கவுள்ளாா்.

சுதந்திர தின விழாவையொட்டி, விழுப்புரம் மாவட்டத்தில் சுமாா் 2ஆயிரம் போலீஸாா் பாதுகாப்புப் பணியில் ஈடுபட்டுள்ளனா். மக்கள் அதிகம் கூடும் பேருந்து, ரயில் நிலையங்களில் பாதுகாப்பு பலப்படுத்தப்பட்டுள்ளது. வெள்ளிக்கிழமை விழுப்புரம் புதிய பேருந்து நிலையம், ரயில் நிலையத்தில் மோப்ப நாய் ‘ராணி’ உதவியுடன், காவல் உதவி ஆய்வாளா் முருகன் தலைமையிலான போலீஸாா் தீவிர சோதனையில் ஈடுபட்டனா். பயணிகளின் உடைமைகள் மெட்டல் டிடெக்டா் கருவி மூலம் சோதனையிடப்பட்டன. அதேபோல, பேருந்துகளின் உள்ளேயும், ரயில் பெட்டிகளிலும் போலீஸாா் தீவிர சோதனை நடத்தினா்.