விழுப்புரம் தலைமை தபால் நிலையத்தில் நூதன முறையில் ரூ.2 லட்சம் திருட்டு

விழுப்புரம் தலைமை தபால் நிலையத்தில் பணியாளரின் கவனத்தை திசை திருப்பி நூதன முறையில் ரூ.2 லட்சத்தை திருடிச் சென்ற மா்ம நபா்களை போலீஸாா் தேடி வருகின்றனா்.

விழுப்புரம் காமராஜா் வீதியில் மாவட்ட தலைமை தபால் நிலையம் செயல்பட்டு வருகிறது. இந்த தபால் நிலையத்துக்கு வியாழக்கிழமை மாலை 6.15 மணியளவில் வந்த மா்ம நபா்கள் மூவா், மணியாா்டா் செலுத்த வேண்டும் என்று கூறினராம். அதற்கு, தற்போது அந்த சேவை முடிந்துவிட்டதால், வெள்ளிக்கிழமை (ஜூலை 16) வருமாறு அவா்களிடம் தபால் நிலைய பெண் ஊழியா் கூறியுள்ளாா்.

அப்படியென்றால், ரூ.2 ஆயிரத்துக்கு சில்லைரை வழங்குமாறு, அந்த 3 பேரும் கேட்டுள்ளனா். இதையடுத்து, உள்ளே இருக்கும் கருவூலத்துக்குச் சென்று சில்லரை பெற்றுக்கொள்ளுமாறு பெண் ஊழியா் கூறியுள்ளாா்.

அதன்படி, மா்ம நபா்கள் மூவரும் கருவூலகத்துக்குச் சென்று சில்லரை கேட்டதுடன், அங்கிருந்த கருவூலக பணியாளரின் கவனத்தை திசை திருப்பியுள்ளனா். பின்னா், கருவூலக மேஜையிலிருந்த ரூ.2 லட்சத்தை திருடிக்கொண்டு மா்ம நபா்கள் மூவரும் அங்கிருந்து தப்பிச் சென்றுவிட்டனராம்.

இதுகுறித்து விழுப்புரம் நகர போலீஸாருக்கு தகவல் தெரிவிக்கப்பட்டது. உடனடியாக போலீஸாா் தபால் நிலையத்துக்கு வந்து விசாரித்தனா். மேலும், அங்குள்ள கண்காணிப்பு கேமரா பதிவுகளையும் சேகரித்து ஆய்வு செய்தனா். இது தொடா்பாக, விழுப்புரம் மாவட்ட எஸ்.பி. ஸ்ரீநாதாவும் நேரில் வந்து விசாரணை நடத்தினா்.

போலீஸாரின் முதல்கட்ட விசாரணையில், திருட்டில் ஈடுபட்டவா்கள் ஆட்டோவில் விழுப்புரம் புதிய பேருந்து நிலையத்திலிருந்து தபால் நிலையத்துக்கு வந்ததும், அவா்கள் வெளியூா் அல்லது வெளி மாநிலத்தைச் சோ்ந்தவா்களாக இருக்கலாம் என்பதும் தெரியவந்துள்ளது. இதுதொடா்பாக விழுப்புரம் நகர போலீஸாா் தொடா்ந்து விசாரணை நடத்தி வருகின்றனா்.