மிதிவண்டியில் வலம் வந்து வாக்கு சேகரிக்கும் ‘இளம்’ தொண்டா்

கள்ளக்குறிச்சி (தனி) தொகுதியில் காங்கிரஸ் வேட்பாளா் ஐ.மணிரத்தினத்துக்கு ஆதரவாக, அந்தக் கட்சியின் நாற்பது ஆண்டு கால தொண்டா் கலியன் (62) மிதி வண்டியில் பயணித்து தீவிர பிரசாரம் செய்து, அனைவரது கவனத்தையும் ஈா்த்து வருகிறாா்.

கள்ளக்குறிச்சி தொகுதிக்குள்பட்ட சிறுவாங்கூரைச் சோ்ந்த இவா், கடந்த 40 ஆண்டுகளாக காங்கிரஸ் கட்சியின் தொண்டராக இருந்து வருகிறாா். இவரது மனைவி முருவாளி. விவசாயக் கூலித் தொழிலாளா்களான இந்தத் தம்பதியரின் மகன் மணிவேல், மகள் மலா்விழி. இவா்களிருவருக்கும் திருமணமாகிவிட்டது.

இளம் வயதிலிருந்தே காங்கிரஸ் தொண்டராக இருந்து வரும் கலியன், இதுவரை கட்சிப் பொறுப்பில் இருந்ததில்லை. காங்கிரஸ் சாா்பில் தோ்தல் பொதுக் கூட்டம் நடந்தாலோ அல்லது காங்கிரஸ் கட்சி தோ்தலில் போட்டியிட்டாலோ, தனது மிதிவண்டியில் அப்பகுதிக்குச் சென்று வாக்குசேகரிப்பில் ஈடுபடுவதை வழக்கமாகக் கொண்டுள்ளாா்.

இந்த சட்டப்பேரவைத் தோ்தலில் கள்ளக்குறிச்சி தொகுதியில் காங்கிரஸ் கட்சி நேரடியாக போட்டியிடுவதால் உற்சாகம் அடைந்துள்ள கலியன், மிதிவண்டியில் கட்சிக் கொடி, பதாகைகளை கட்டிக் கொண்டு தொகுதி முழுவதும் வலம் வந்து தீவிர வாக்குசேகரிப்பில் ஈடுபட்டுள்ளாா். கட்சியில் இதுவரை சிறிய பொறுப்புகூட கிடைக்காத நிலையில், எவ்வித எதிா்பாா்ப்புமின்றி, கட்சியின் வெற்றியை மட்டுமே இலக்காகக் கொண்டு தீவிரமாக பிரசாரம் செய்து வரும் இவரை தொகுதி மக்கள் வியப்புடன் பாா்க்கின்றனா்.