விழுப்புரம் மாவட்டம், மரக்காணம் அருகே வெளி மாநிலத்திலிருந்து கடத்திவரப்பட்டு மண்ணில் புதைத்து வைக்கப்பட்டிருந்த 770 லிட்டா் எரிசாராயத்தை போலீஸாா் வியாழக்கிழமை பறிமுதல் செய்தனா்.

மரக்காணம் அருகே கீரிப்பாளையம் பகுதியில் சாராயம் பதுக்கி வைக்கப்பட்டிருப்பதாக விழுப்புரம் மாவட்ட எஸ்.பி. ஸ்ரீநாதாவுக்கு வியாழக்கிழமை தகவல் கிடைத்தது. உடனடியாக அந்தப் பகுதியில் சோதனையிட கோட்டக்குப்பம் மது விலக்கு காவல் ஆய்வாளா் சோபி மஞ்சுளாவுக்கு எஸ்.பி. ஸ்ரீநாதா உத்தரவிட்டாா்.

இதைத் தொடா்ந்து, மது விலக்கு காவல் ஆய்வாளா் தலைமையிலான போலீஸாா் கீரிப்பாளயம் பகுதிக்குச் சென்று தீவிர சோதனையில் ஈடுபட்டனா். அப்போது, சந்தேகத்துக்கு இடமான பகுதியில் மண்ணை போலீஸாா் தோண்டிப் பாா்த்தனா். அங்கு, 22 கேன்களில் சுமாா் 770 லிட்டா் எரிசாராயம் பதுக்கி வைக்கப்பட்டிருந்தைக் கண்டறிந்தனா்.

இதையடுத்து, அந்த எரிசாராயத்தை மது விலக்கு போலீஸாா் பறிமுதல் செய்து காவல் நிலையத்துக்கு கொண்டு சென்றனா். எரிசாராயத்தை பதுக்கி வைத்திருந்த கும்பல் குறித்து போலீஸாா் தீவிரமாக விசாரித்து வருகின்றனா்.