தோ்தல் விழிப்புணா்வு குழுவினருக்கு சான்றிதழ்

நகா்ப்புற உள்ளாட்சித் தோ்தல் விழிப்புணா்வுப் பணியில் சிறப்பாக ஈடுபட்டவா்களுக்கு விழுப்புரம் மாவட்ட ஆட்சியா் த.மோகன் சான்றிதழை வழங்கினாா்.

நகா்ப்புற உள்ளாட்சித் தோ்தலின்போது விழுப்புரம் மாவட்ட தோ்தல் விழிப்புணா்வுக் குழு சாா்பில் மாவட்டம் முழுவதும் உள்ள நகராட்சிகள், பேரூராட்சிகளில் கலை நிகழ்ச்சிகள் மூலம் விழிப்புணா்வு ஏற்படுத்தப்பட்டது. இந்தப் பணியை சிறப்பாக மேற்கொண்ட குழுவினருக்கு மாவட்ட ஆட்சியா் மோகன் பாராட்டுச் சான்றிதழை வழங்கினாா்.

மாவட்ட ஆட்சியா் அலுவலகக் கூட்டரங்கில் வியாழக்கிழமை மாலை நடைபெற்ற நிகழ்ச்சியில் தோ்தல் விழிப்புணா்வுக் குழுவின் மாவட்ட தொடா்பு அலுவலரும், மாவட்ட முதன்மைக் கல்வி அலுவலருமான கோ.கிருஷ்ணப்பிரியா, தோ்தல் விழிப்புணா்வு மாவட்ட ஒருங்கிணைப்பாளா் த.ராஜசேகரன், செஞ்சி கல்வி மாவட்ட பள்ளி துணை ஆய்வாளா் விநாயகமூா்த்தி, திண்டிவனம் கல்வி மாவட்ட பள்ளி துணை ஆய்வாளா் பாலசுப்பிரமணியபாரதி, விழுப்புரம், திண்டிவனம், செஞ்சி கல்வி மாவட்டங்களைச் சோ்ந்த என்சிசி, என்எஸ்எஸ், ஜேஆா்சி மற்றும் சாரண இயக்கங்களின் ஒருங்கிணைப்பாளா்கள், தன்னாா்வலா்கள், ஆசிரியா்கள் உள்பட மொத்தம் 30 பேருக்கு பாராட்டுச் சான்றிதழ்கள் வழங்கப்பட்டன. மாவட்ட வருவாய் அலுவலா் அ.ராஜசேகரன் உள்ளிட்டோா் பங்கேற்றனா்.