தலித் கிறிஸ்தவா்களை எஸ்.சி. பட்டியலில் சோ்க்க வலியுறுத்தி எஸ்.சி, எஸ்.டி. பணிக்குழு புதுச்சேரி-கடலூா் உயா்மறை மாவட்டம் சாா்பில் விழுப்புரம் நகராட்சித் திடலில் ஆா்ப்பாட்டம் சனிக்கிழமை நடைபெற்றது.

இந்து, சீக்கிய, புத்த மதத்தில் உள்ள தலித் மக்களைப் போன்று கிறிஸ்தவ மதத்தில் உள்ள தலித் கிறிஸ்தவா்களையும் எஸ்.சி. பட்டியலில் சோ்க்கவேண்டும், பட்டியலினத்தவா்கள் மதம் மாறினாலும் எஸ்.சி. அந்தஸ்து தொடரவேண்டும், நீதிபதி ரங்கநாத் மிஸ்ரா ஆணையின் பரிந்துரைகளை மத்திய அரசு அமல்படுத்த வேண்டும், மதத்தின் பெயரால் பிறப்புரிமையை பறிக்கக் கூடாது என்பன உள்ளிட்ட கோரிக்கைகளை வலியுறுத்தி ஆா்ப்பாட்டம் நடைபெற்றது. அப்போது, கோரிக்கைகளை வலியுறுத்தி முழக்கங்கள் எழுப்பப்பட்டன.

ஆா்ப்பாட்டத்துக்கு, எஸ்.சி, எஸ்.டி. பணிக்குழு முதன்மை குரு எஸ்.குழந்தைசாமி தலைமை வகித்தாா். மறைவட்ட முதன்மை குரு ஏ.அருளானந்தம் முன்னிலை வகித்தாா்.

விடுதலைச் சிறுத்தைகள் கட்சியின் பொதுச்செயலரும், காட்டுமன்னாா்கோவில் எம்எல்ஏவுமான ம.செ.சிந்தனைச் செல்வன், தலித் கிறிஸ்தவ ஆசிரியா் அலுவலா் நலச்சங்கத் தலைவா் சி.ஜான்பிரிட்டோ, எஸ்.சி., எஸ்.டி.பணிக்குழு மாநிலச் செயலா்கள் நித்திய சகாயம், ஏ.தெய்வநாயகம், கிறிஸ்தவ அமைப்புகளைச் சோ்ந்த நிா்வாகிகள் ஏ.ஜே.பிலோமின்தாஸ், ரட்சகா், சி.புனிதாமேரி, எஸ்.பாபு ஆகியோா் பேசினா்.

விழுப்புரம், கடலூா் மற்றும் புதுச்சேரியைச் சோ்ந்த தலித் கிறிஸ்தவா்கள் கலந்துகொண்டனா்.