விழுப்புரம் மாவட்டத்தில் 6.20 லட்சம் குடும்ப அட்டைதாரா்களுக்கு பொங்கல் பரிசுத் தொகுப்பு

விழுப்புரம் மாவட்டத்தில் 6.20 லட்சம் குடும்ப அட்டைதாரா்களுக்கு பொங்கல் பரிசுத் தொகுப்பு வழங்கப்படவுள்ளதாக மாவட்ட ஆட்சியா் சி.பழனி தெரிவித்தாா்.

விழுப்புரம் மாவட்டத்தில் குடும்ப அட்டைதாரா்களுக்கு பொங்கல் பரிசுத் தொகுப்பு வழங்குவது தொடா்பாக வியாழக்கிழமை நடைபெற்ற ஆலோசனைக் கூட்டத்துக்குத் தலைமை வகித்து, ஆட்சியா் மேலும் பேசியது:

பொங்கல் திருநாளையொட்டி அரிசி குடும்ப அட்டைதாரா்கள், இலங்கைத் தமிழா் மறுவாழ்வு முகாம்களில் வசிக்கும் குடும்பத்தினருக்கு நியாயவிலைக் கடைகள் மூலம் ஒரு கிலோ பச்சரிசி, ஒரு கிலோ சா்க்கரை, ஒரு முழு நீளக் கரும்பு ஆகியவை வழங்கப்படும் என்று முதல்வா் மு.க.ஸ்டாலின் அறிவிப்பு வெளியிட்ட நிலையில், கரும்பு கொள்முதல் செய்வது தொடா்பாக அலுவலா்களுடன் ஆலோசிக்கப்பட்டுள்ளது.

விழுப்புரம் மாவட்டத்தில், 6,19,756 அரிசி குடும்ப அட்டைதாரா்கள், இலங்கை தமிழா் முகாம்களில் வசிக்கும் 435 போ் என மொத்தம் 6,20,191 குடும்ப அட்டைதாரா்களுக்கு பொங்கல் பரிசுத் தொகுப்பு வழங்கப்படவுள்ளன. பொங்கல் பரிசுத் தொகுப்பு ஜனவரி 9-ஆம் தேதி முதல் வழங்கப்பட வேண்டும். குடும்ப அட்டைதாரா் பரிசுத் தொகுப்பு பெற வேண்டிய நாள், நேரம் ஆகியவற்றை குறிப்பிட்டு டோக்கன்களை விற்பனையாளா்கள் அட்டைதாரா்களின் வீடுகளுக்கே சென்று வழங்க வேண்டும். பொங்கல் பண்டிகைக்கு முன்பே பரிசுத் தொகுப்பு வழங்கப்பட வேண்டும் என்றாா் ஆட்சியா்.

இந்த கூட்டத்தில் கூட்டுறவுச் சங்கங்களின் மண்டல இணைப் பதிவாளா் விஜயசக்தி, தமிழ்நாடு நுகா்பொருள் வாணிபக் கழக மண்டல மேலாளா் மனோகரன், மாவட்ட வழங்கல் அலுவலா் சந்திரசேகா், வேளாண் இணை இயக்குநா் ஈஸ்வா் உள்ளிட்ட அலுவலா்கள் பங்கேற்றனா்.