உங்கள் கணவருக்கு ரிஷப லக்னம். கன்னி ராசி. லக்னத்திற்கும் ஆறாம் வீட்டிற்கும் அதிபதியான சுக்கிரபகவான் பாக்கிய ஸ்தானமான ஒன்பதாம் வீட்டில் அமர்ந்து உச்சம் பெற்ற குருபகவானால் பார்க்கப்படுகிறார். தனம் மற்றும் பூர்வபுண்ணிய புத்திர ஸ்தானாதிபதியான புதபகவான் நீச்சம் பெற்று அந்த வீட்டுக்கதிபதியான குருபகவான் உச்சம் பெற்று இருப்பதால் முழுமையான நீச்சபங்க ராஜயோகத்தைப் பெறுகிறார். தர்மகர்மாதிபதியான சனிபகவான் நான்காம் வீடான சுகஸ்தானத்தில் அமர்ந்து தொழில் ஸ்தானத்தைப் பார்வை செய்கிறார். தற்சமயம் குருமகா தசையில் இறுதிப்பகுதி நடப்பதும் சிறப்பு. உங்களுக்கு கும்ப லக்னம், மீன ராசி. லக்னாதிபதி உச்சம் பெற்று கர்மாதிபதியான செவ்வாய்பகவானுடன் பாக்கிய ஸ்தானத்தில் இணைந்திருக்கிறார். பூர்வபுண்ணியாதிபதியான புதபகவான் லாப ஸ்தானத்தில் பூர்வபுண்ணிய புத்திரகாரகருடனும் களத்திர ஸ்தானாதிபதியுடனும் இணைந்து பூர்வபுண்ணிய ஸ்தானத்தைப் பார்வை செய்கிறார்கள். சுக பாக்கியாதிபதி தொழில் ஸ்தானத்தில் அமர்ந்து சுக ஸ்தானத்தைப் பார்வை செய்கிறார். மேலும் உங்களுக்கு தற்சமயம் சுக்கிரபகவானின் தசையில் இறுதிப்பகுதி நடப்பதால் அடுத்த ஆண்டு இறுதிக்குள் புத்திர பாக்கியம் உண்டாகும். பிரதி சனிக்கிழமைகளில் சனிபகவானை வழிபட்டு வரவும்.