கார்த்திக் சுப்புராஜ் படத்தில் ரஜினிக்கு ஜோடியாக நடிக்கவுள்ள மலையாள நடிகை! (படங்கள்)

2013-ல் பட்டம் போலே என்கிற மலையாளப் படத்தில் கதாநாயகியாக அறிமுகமானார் மாளவிகா மோஹனன். ஒளிப்பதிவாளர் மோஹனனின் மகள். இதன்பிறகு புகழ்பெற்ற ஈரான் இயக்குநர் மஜித் மஜிதி இயக்கிய ஹிந்திப் படமான பியாண்ட் தி கிளவுட்ஸில் நடித்து அதிகக் கவனம் பெற்றார். 

மாளவிகா அடுத்ததாக ரஜினி படத்தில் நடிக்கவுள்ளார் என்பதுதான் இவரைப் பற்றிய அடுத்தப் பரபரப்புச் செய்தியாக உள்ளது. 

கார்த்திக் சுப்புராஜ் இயக்கத்தில் ரஜினி நடிக்கும் படத்தை சன் பிக்சர்ஸ் தயாரிக்கிறது. இந்தப் படத்தின் படப்பிடிப்பு சமீபத்தில் தொடங்கியது. விஜய் சேதுபதி, சிம்ரன், நவாசுதீன் சித்திக், பாபி சிம்ஹா, மேகா ஆகாஷ் போன்றோரும் இப்படத்தில் முக்கிய வேடங்களில் நடித்துவருகிறார்கள்.

இந்தக் கூட்டணியில் மாளவிகா மோஹனனும் இணைந்துள்ளார் என்று புதிய தகவல் வெளியாகியுள்ளது. சிம்ரன் இந்தப் படத்தில் இடம்பெற்றாலும் ரஜினியின் ஜோடியாக நடிப்பது மாளவிகா தான் என அறியப்படுகிறது.

ரஜினி - கார்த்திக் சுப்புராஜ் படத்தில் மாளவிகா நடிப்பது குறித்த அதிகாரபூர்வத் தகவல் விரைவில் வெளியாகும் என்று எதிர்பார்க்கப்படுகிறது.