பொங்கல் தினத்தில் அறிவிப்புகள்: ‘கதாநாயகி’ ஜூலி தகவல்!

பிக் பாஸ் புகழ் ஜூலி, தற்போது கதாநாயகி ஆகியுள்ளார். 

இதுகுறித்து ட்விட்டரில் அறிவித்துள்ள ஜூலி ஒரு பேட்டியில் படம் குறித்து சில தகவல்களைப் பகிர்ந்துகொண்டார். அதில் அவர் கூறியதாவது: எனக்கு இந்தப் படத்தில் வலுவான கதாபாத்திரம். வேறு எந்தத் தகவல்களையும் இப்போதைக்குச் சொல்லமுடியாது. பொங்கல் அன்று படம் குறித்த அதிகாரபூர்வத் தகவல்கள் வெளியாகும். அதன்பிறகு படப்பிடிப்பு நடைபெறும் என்று கூறியுள்ளார். ஜூலிக்கு ஜோடியாக தப்பாட்டம் படத்தில் நடித்த சுதாகர் நடிக்கவுள்ளார்.

ஜல்லிக்கட்டுப் போராட்டத்தில் பங்கேற்று, கோஷங்கள் மூலம் அரசியல்வாதிகளை விமரிசனம் செய்து புகழ்பெற்றவரான ஜூலி, விஜய் தொலைக்காட்சியில் ஒளிபரப்பான பிக் பாஸ் நிகழ்ச்சியில், போட்டியாளராகக் களமிறங்கினார். ஜல்லிக்கட்டுப் போராட்டம் நடைபெற்ற சமயத்தில் இவருடைய கோஷங்கள் வீடியோக்களாக சமூகவலைத்தளங்கில் அதிகம் பகிரப்பட்டன. அப்போது, வீரத்தமிழச்சி என்கிற பட்டமும் அவருக்கு அளிக்கப்பட்டது. ஆனால் அதன்பிறகு அவர் கொடூரமாகக் கொலை செய்யப்பட்டதாக வாட்ஸப்பில் வதந்திகள் பரவியதால் பரபரப்பு ஏற்பட்டது. பிறகு ஒரு பேட்டியில், தான் நலமுடன் உள்ளதாக ஜூலி அறிவித்தார். இந்நிலையில், பிக் பாஸ் நிகழ்ச்சியில் ஒரு போட்டியாளராக அவர் அறிமுகமானது பலருக்கும் ஆச்சர்யத்தை அளித்தது. பிக் பாஸ் நிகழ்ச்சியில் திடீரென ஓவியாவுக்கும் ஜூலிக்கும் இடையே கருத்து மோதல் உண்டானதால் ரசிகர்களின் ஆதரவை இழந்த ஜூலி, பிறகு போட்டியிலிருந்து வெளியேற்றப்பட்டார். பிறகு கலைஞர் தொலைக்காட்சியில் ஒரு நிகழ்ச்சியின் தொகுப்பாளராகப் பணியாற்ற ஆரம்பித்தார். தற்போது கதாநாயகியாக முன்னேற்றம் கண்டுள்ளார்.