படத்தின் தலைப்புக்கும் நித்யானந்தாவுக்கும் சம்பந்தமில்லை: சர்ச்சைக்குரிய படத்தலைப்பு குறித்து இயக்குநர் ஆதிக் ரவிச்சந்திரன்!

த்ரிஷா இல்லனா நயன்தாரா படத்துக்குப் பிறகு நடிகர் ஜி.வி. பிரகாஷும் இயக்குநர் ஆதிக் ரவிச்சந்திரனும் மீண்டும் கூட்டணி அமைத்துள்ளார்கள்.

இறுதிக்கட்டப் படப்பிடிப்பு வரை வந்துவிட்ட நிலையில், படத்தின் தலைப்பும் ஃபர்ஸ்ட் லுக் போஸ்டரும் வெளியிடப்பட்டுள்ளன.

காதலை தேடி நித்யா நந்தா என இப்படத்துக்குத் தலைப்பிடப்பட்டுள்ளது. கதாநாயகனாக நடிப்பதோடு இசையமைப்பாளராகவும் இப்படத்தில் பணியாற்றி வருகிறார் ஜி.வி. பிரகாஷ். அனேகன் படத்தில் நடித்த அம்ரியா தஸ்துர் கதாநாயகியாக நடிக்கிறார். யோகி பாபு, விடிவி கணேஷ், சஞ்சிதா ஷெட்டி, சோனியா அகர்வால் போன்றோரும் இப்படத்தில் நடித்துள்ளார்கள்.  

படத்தின் தலைப்பில் நித்யா நந்தா என்று வருவதால் நித்யானந்தா சர்ச்சைகள் குறித்து படத்தில் காட்சிகள் வருகிறதா என்கிற கேள்விக்கு ஒரு பேட்டியில் இயக்குநர் ஆதிக் ரவிச்சந்திரன் கூறியதாவது: தலைப்பை வைத்து கற்பனைக்குதிரையைத் தட்டிவிடவேண்டாம். இப்படத்துக்கும் நித்யானந்தாவுக்கும் எவ்விதச் சம்பந்தமும் இல்லை. படத்தில் வருகிற காதல் ஜோடிகளின் பெயர்கள் நித்யா, நந்தா. அவ்வளவுதான். சமகால உறவுகள் குறித்தும் தன் உண்மையான காதலை நிரூபிக்கக் காதலன் எவ்வளவு தூரம் செல்கிறான் என்பதையும் படத்தில் விளக்கியுள்ளேன் என்று கூறியுள்ளார்.