சூரரைப் போற்று படத்துக்கு அமேசான் பிரைம் வழங்கிய தொகை: புதிய தகவல்!

சூர்யா நடித்துள்ள சூரரைப் போற்று படத்துக்கு அமேசான் பிரைம் நிறுவனம் ரூ. 40 கோடி வழங்கியுள்ளதாகத் தகவல்கள் வெளியாகியுள்ளன. 

சூர்யா நடித்துள்ள சூரரைப் போற்று படம், அமேசான் பிரைம் ஓடிடி தளத்தில் அக்டோபர் 30 அன்று வெளியாகவுள்ளது.

‘இறுதிச்சுற்று’ சுதா கொங்கராவின் அடுத்தப் படமான சூரரைப் போற்று படத்தில் கதாநாயகனாக நடித்துள்ளார் சூர்யா. இது அவருடைய 38-வது படம்.

கதாநாயகியாக மலையாள நடிகை அபர்ணா முரளி நடித்துள்ளார். எட்டு தோட்டாக்கள், சர்வம் தாளமயம் ஆகிய தமிழ்ப்படங்களில் இவர் நடித்துள்ளார். இப்படத்துக்கு இசை - ஜி.வி. பிரகாஷ். ஒளிப்பதிவு - நிகேத் பொம்மிரெட்டி.

சூர்யாவின் 2டி நிறுவனமும் குனீத் மோங்காவின் சிக்யா நிறுவனமும் இணைந்து இப்படத்தைத் தயாரித்துள்ளன. குனீத் மோங்கா இப்படத்தின் மூலம் தயாரிப்பாளராகத் தமிழில் அறிமுகமாகிறார். ஹிந்தியில் லஞ்ச்பாக்ஸ், மாசான் போன்ற படங்களைத் தயாரித்துள்ளார். கடந்த வருடம் ஏப்ரல் 8 அன்று படப்பிடிப்பு தொடங்கிய நிலையில் செப்டம்பர் மாதம் படப்பிடிப்பு நிறைவு பெற்றது. கரோனா அச்சுறுத்தல் காரணமாக திரையரங்குகள் இன்னமும் இயங்காமல் உள்ளதால், இயல்பு நிலைமை திரும்பிய பிறகு திரையரங்கில் வெளியாவதாக இருந்தது. 

இந்நிலையில் சூரரைப் போற்று படம், அமேசான் ஓடிடி தளத்தில் வெளியாகவுள்ளது. இதற்கான அதிகாரபூர்வ அறிவிப்பை சூர்யா வெளியிட்டுள்ளார். சூரரைப் போற்று படம் அக்டோபர் 30-ல் அமேசான் பிரைமில் வெளியாகும் என்றும் அறிவிக்கப்பட்டுள்ளது.

சூரரைப் போற்று வியாபாரம் மூலம் கிடைத்த தொகையிலிருந்து ரூ. 5 கோடியை கரோனாவால் பாதிக்கப்பட்டவர்களுக்கும் முன்களப் பணியாளர்களுக்கும் வழங்குவதாக சூர்யா அறிவித்துள்ளார்.

இந்நிலையில் சூரரைப் போற்று படத்தை ஓடிடி தளத்தில் நேரடியாக வெளியிட அமேசான் பிரைம் நிறுவனம் ரூ. 40 கோடி வழங்கியுள்ளதாகத் தகவல்கள் வெளியாகியுள்ளன. ஓடிடி தளங்களில் வெளியாகும் படங்கள் குறித்த செய்திகளை வெளியிடும் லெட்ஸ் ஓடிடி தளம் இத்தகவலை வெளியிட்டுள்ளது. எனினும் பட வியாபாரம் குறித்த அதிகாரபூர்வத் தகவல் சூர்யா தரப்பிலிருந்து வெளியிடப்படவில்லை.