சூரரைப் போற்று படப் பாடலின் ஒரு நிமிட விடியோ வெளியீடு!

‘இறுதிச்சுற்று’ சுதா கொங்கராவின் அடுத்தப் படமான சூரரைப் போற்று படத்தில் கதாநாயகனாக நடித்துள்ளார் சூர்யா. இது அவருடைய 38-வது படம்.

கதாநாயகியாக மலையாள நடிகை அபர்ணா முரளி நடித்துள்ளார். எட்டு தோட்டாக்கள், சர்வம் தாளமயம் ஆகிய தமிழ்ப்படங்களில் இவர் நடித்துள்ளார். இப்படத்துக்கு இசை - ஜி.வி. பிரகாஷ். ஒளிப்பதிவு - நிகேத் பொம்மிரெட்டி.

சூர்யாவின் 2டி நிறுவனமும் குனீத் மோங்காவின் சிக்யா நிறுவனமும் இணைந்து இப்படத்தைத் தயாரித்துள்ளன. குனீத் மோங்கா இப்படத்தின் மூலம் தயாரிப்பாளராகத் தமிழில் அறிமுகமாகிறார். ஹிந்தியில் லஞ்ச்பாக்ஸ், மாசான் போன்ற படங்களைத் தயாரித்துள்ளார். கடந்த வருடம் ஏப்ரல் 8 அன்று படப்பிடிப்பு தொடங்கிய நிலையில் செப்டம்பர் மாதம் படப்பிடிப்பு நிறைவு பெற்றது. கரோனா அச்சுறுத்தல் காரணமாக ஊரடங்கு உத்தரவு அமலில் உள்ளதால் இயல்பு நிலைமை திரும்பிய பிறகு இந்தப் படம் வெளிவரவுள்ளது.

சூரரைப் போற்று படம் தணிக்கையில் யு சான்றிதழைப் பெற்றுள்ளது. 

இன்று தனது பிறந்த நாளைக் கொண்டாடுகிறார் நடிகர் சூர்யா. இதனால் சூரரைப் போற்று படத்தின் காட்டுப் பயலே பாடலின் ஒரு நிமிட விடியோ வெளியிடப்பட்டுள்ளது. சிநேகன் எழுதிய பாடலை தீ பாடியுள்ளார்.