நடிகர் லிவிங்ஸ்டனின் மகள் ஜோவிதா சன் டிவி தொடரில் மீண்டும் நாயகியாக களமிறங்கவிருக்கிறார்.
சன் தொலைக்காட்சியில் ஒளிபரப்பாகி வரும் பூவே உனக்காக தொடரில் கதாநாயகிகளில் ஒருவராக அறிமுகமானவர் ஜோவிதா. இவர் பிரபல நடிகர் லிவிங்ஸ்டனின் மகள் என்பது குறிப்பிடத்தக்கது.
பூவே உனக்காக தொடரில் அவரது வேடத்துக்கு நல்ல வரவேற்பு கிடைத்தது. இந்த நிலையில் இந்தத் தொடரில் இருந்து பாதியிலேயே அவர் வெளியேறினார். மேற்படிப்புக்காக அந்தத் தொடரில் இருந்து விலகியதாக அவர் தனது இன்ஸ்டாகிராம் பக்கத்தில் தெரிவித்திருந்தார்.
ஆனால் பூவே உனக்காக தயாரிப்பு தரப்புக்கும் அவருக்கும் இடையே பிரச்னை காரணமாகவே அவர் விலகியதாக கூறப்பட்டுவந்தது. இந்த நிலையில் அவர் மீண்டும் சன் டிவி தொடரில் கதாநாயகியாக நடிக்கவிருக்கிறார்.
இந்தத் தொடரானது, கஸ்தூரி நிவசா என்ற கன்னட தொடர் ஒன்றின் மறு உருவாக்கம் என்று கூறப்படுகிறது. இந்தத் தொடரில் நடிகை அம்பிகா முக்கிய வேடத்தில் நடிக்கவிருக்கிறார். இந்தத் தொடரில் கார்த்திக் வாசு கதாநாயகனாக நடிக்கிறார். இதற்கான அறிவிப்பு விரைவில் வெளியாகும் என எதிர்பார்க்கப்படுகிறது.