ஹிந்தியில் மிரட்டல்! 10 கோடி பார்வைகளைக் கடந்த புஷ்பா - 2 டிரைலர்!

புஷ்பா - 2 திரைப்படத்தின் டிரைலர் பல சாதனைகளைப் புரிந்து வருகிறது.

இயக்குநர் சுகுமார் இயக்கத்தில் அல்லு அர்ஜுன் நடிப்பில் உருவான புஷ்பா - 2 படத்தின் படப்பிடிப்பு நீண்ட நாள்களாக நடைபெற்று வந்தது. ஹைதராபாத் மற்றும் வெளிநாடுகளில் திட்டமிட்டபடி படப்பிடிப்பை நடத்தினாலும் சில பிரச்னைகளால் தாமதமானது.

இதற்கிடையே, மூன்று முறைக்கு மேல் படத்தின் வெளியீட்டுத் தேதியும் மாற்றப்பட்டதால் ரசிகர்களிடையே ஏமாற்றம் ஏற்பட்டது. இறுதியாக, இப்படத்தை டிசம்பர் 5 ஆம் தேதி உலகளவில் 11,000 திரைகளில் வெளியிட தயாரிப்பு நிறுவனம் முடிவு செய்துள்ளது.

இதையும் படிக்க: ‘வணங்கான்... கனத்த இதயத்துடன்...’ அருண் விஜய்யின் திடீர் பதிவு!

இந்த நிலையில், படத்தின் டிரைலர் நேற்று (நவ.17) தமிழ், தெலுங்கு, ஹிந்தி, பெங்காலி, மலையாளம் மொழிகளில் வெளியானது.

பெரிய பொருள் செலவில் எடுக்கப்பட்ட படமென்பதால் காட்சிகள் பிரம்மாண்டமாக இருக்கின்றன. குறிப்பாக, அல்லு அர்ஜுன் மற்றும் ஃபஹத் ஃபாசிலுக்கு இடையேயான வசனங்கள் ரசிகர்களிடம் வைராகியுள்ளது.

ஆச்சரியமாக தெலுங்குக்கு இணையான பார்வைகள் ஹிந்தி டிரைலருக்கும் கிடைத்துள்ளதால் இப்படம் பாலிவுட்டில் பெரிய வெற்றியைப் பதிவு செய்யும் என்றே தெரிகிறது.

இதுவரை, யூடியூபில் தெலுங்கு (44 மில்லியன்), ஹிந்தி (41 மில்லியன்), தமிழ் (4.4 மில்லியன்), கன்னடம் (2 மில்லியன்), மலையாளம் (1.8 மில்லியன்), பெங்காலி (5 லட்சம்) என 100 மில்லியன் (10 கோடி) வரை டிரைலருக்கான பார்வைகள் கிடைத்துள்ளன.

மேலும், தென்னிந்தியளவில் டிரைலர் வெளியான 15 மணி நேரத்திற்குள் 40 மில்லியன் பார்வைகளைக் கடந்த முதல் படம் புஷ்பா - 2 என்கிற சாதனையையும் பெற்றுள்ளது.