உளவியல் சிகிச்சையிலிருந்த நடிகர் ஸ்ரீ புதிய அறிவிப்பை வெளியிட்டுள்ளார்.

வழக்கு எண் 18/9’, ‘ஓநாயும் ஆட்டுக்குட்டியும்’, ‘வில் அம்பு‘, ‘மாநகரம்’ உள்ளிட்ட படங்களில் நடித்தவா் நடிகா் ஸ்ரீ. அண்மை காலமாக ஸ்ரீ நடிப்பில் எந்தப் படமும் வெளியாகவில்லை.

இதற்கிடையே, சில மாதங்களுக்கு முன் இன்ஸ்டாகிராமில் உடல் எடை மெலிந்த தோற்றத்தில் புகைப்படங்களைப் பதிவேற்றி, சா்ச்சைக்குரிய வகையிலான காணொலியையும் வெளியிட்டாா்.

இதைக் கண்ட ரசிகா்கள் கடும் அதிா்ச்சியடைந்ததுடன் ஸ்ரீ-க்கு முறையான உளவியல் சிகிச்சை தேவை என்று அவரின் இன்ஸ்டா பக்கத்தில் தெரிவித்து வந்தனர்.

தொடர்ந்து, நடிகா் ஸ்ரீ-யின் குடும்பம் அவரை மீட்டு சிகிச்சை அளித்தனர். இடைப்பட்ட காலத்தில் ஸ்ரீ இன்ஸ்டாகிராமில் சர்ச்சையான புகைப்படங்களையோ காணொலிகளையோ வெளியிடவில்லை.

இந்த நிலையில், ஸ்ரீ தன் இன்ஸ்டாகிராம் பக்கத்தில் தலைமுடியைச் சீராக்கி புதிய தோற்றத்திலிருக்கும் புகைப்படத்தை அடையாளப் படமாக வைத்துள்ளார்.

மேலும், ”மே ஐ கம் இன் (May eye come in) எனப் பெயரிடப்பட்ட தன் நாவலை அறிமுகப்படுத்தியிருக்கிறார். ஆண் - பெண் உறவுச் சிக்கலை மையமாகக் கொண்ட இந்த நாவலை அமேசான் கிண்டிலில் வெளியிட்டுள்ளார்.

ரசிகர்களிடம் கவலையை ஏற்படுத்திய ஸ்ரீ, ஒரு எழுத்தாளராக மீண்டும் வெளிச்சத்திற்கு வந்தது பலருக்கும் மகிழ்ச்சியை ஏற்படுத்தியுள்ளது.

இதையும் படிக்க: மீண்டும் நித்திலன் இயக்கத்தில் விஜய் சேதுபதி!