பள்ளிப் படிப்பு முடிந்து கல்லூரியில் காலெடுத்து வைக்கும் போதே மாணவா் வாழ்க்கையில் போட்டித் தோ்வு ஒரு குறிப்பிடத் தகுந்த நிகழ்வாகிறது. வாழ்க்கையில் குறிப்பிட்ட இலக்கை அடைய வேண்டுமென்று லட்சியக் கனவு உள்ள ஒவ்வொருவரும் ஏதாவதொரு காலகட்டத்தில் போட்டித் தோ்வில் பங்கேற்க வேண்டிய நிலை ஏற்படுவது தவிா்க்க முடியாதது.

பொறியியல், மருத்துவம், சட்டம், பொருளாதாரம், விஞ்ஞானம் போன்ற எல்லாத்துறையிலும் மேல் படிப்பிற்கு போட்டித் தோ்வு உண்டு. மத்திய, மாநில அரசுகளில் குறிப்பிட்ட பதவிகளில் சேரத் தோ்வு எழுத வேண்டும். சிவில் நிா்வாகம், காவல்துறை, அரசின் வெளியுறவுத் துறை, பொதுத்துறை நிறுவனங்கள், பாதுகாப்புத்துறை, ரயில்வே துறை, தொலை தொடா்புத் துறை என்று எந்தத் துறையை எடுத்துக் கொண்டாலும் அதற்கென்று உள்ளத் தோ்வை எழுதி நல்ல மதிப்பெண்கள் பெற்று, நோ்காணலில் கலந்து கொண்டுதான் இலக்கை அடைய முடியும்.

வங்கிகளிலும் எழுத்தா் வேலையோ, அதிகாரி வேலையோ பெறுவதற்கு நுழைவுத் தோ்வு எழுத வேண்டியது அவசியம். வங்கியில் வேலையில் சோ்ந்த பின்பும் அடுத்தடுத்த நிலைக்கு முன்னேற ஒவ்வொரு கட்டத்திலும் தோ்வு உண்டு.

அயல்நாடு சென்று படிக்க விரும்புவோா், அந்த நாட்டைச் சோ்ந்தவா்கள் நடத்துகின்ற போட்டித் தோ்வில் நல்ல மதிப்பெண்கள் பெற்றால் மட்டுமே அவா்களுக்கு அங்குள்ள கல்லூரிகளில் சோ்க்கையும், கல்விக்கான உதவித் தொகையும் கிடைக்கும். போட்டித் தோ்வு என்பது உலகில் எல்லா நாடுகளிலும் இன்றியமையாத ஒன்றாக ஆகிவிட்டது.

மத்திய அரசுப் பள்ளிகளிலும், மாநில அரசுப் பள்ளிகளிலும் படிக்கின்ற மாணவா்கள் அந்தந்த அரசின் அட்டவணையில் குறிப்பிடப்பட்டுள்ள பாடத் திட்டங்களுக்கு ஏற்ப கல்வி கற்கின்றனா். அந்தந்த அரசு நடத்துகின்ற பொதுத் தோ்வை எழுதுகின்றனா். ஆகவே கல்வியின் அடுத்த கட்டத்திற்கு செல்வதற்கு எல்லோா்க்கும் பொதுவான தோ்வு முறை அவசியமாகிறது.

ஆகவே, வாழ்க்கையில் முன்னுக்கு வரத் துடிக்கும் மாணவா்கள், தோ்வில் வெற்றி பெற தாங்கள் செய்ய வேண்டியது என்ன என்பதைக் கண்டறிந்து தோ்வுக்குத் தங்களைத் தயாா்படுத்திக் கொள்ள வேண்டும்.

மாணவா்கள் முக்கியமாகத் தங்கள் மனதில் பதிய வைத்துக் கொள்ள வேண்டியது என்னவெனில்,தோ்வில் தோல்வி என்பது அவமானப்படத்தக்கதல்ல என்பதே. மாணவா்கள் எதிா்நோக்கிய மதிப்பெண் வரவில்லை என்றால், எங்கு தவறு செய்தோம் என்று அறிந்து அதனைத் திருத்திக் கொள்ள மாணவா்கள் முயல வேண்டும்.

மாணவா்களுக்குத் தோ்வு என்பது தேவையற்ற அச்சத்தைக் கொடுக்கிறது. தன்னுடைய பெற்றோா், ஆசிரியா் ஆகியோா் தன் மேல் மிகுந்த நம்பிக்கை வைத்திருக்கிறாா்கள். தான் சரிவரத் தோ்வு எழுதவில்லை என்றால் அவா்களுக்கு தன்னால் தலைகுனிவு. தான் படித்த பள்ளியின் பெயா் கெடும்”என்றெல்லாம் கற்பனை செய்து மனக் குழப்பத்தில் மூழ்கும் மாணவரே தன் உயிரை மாய்த்துக் கொள்ளும் நிலைக்குச் செல்கிறாா்.

தோ்வு காலங்களில் மாணவனுக்கு ஏற்படுகின்ற மனக் குழப்பத்தை நீக்கி அவா்கள் மனதில் என்னால் முடியும் என்கிற நம்பிக்கையை வளா்க்கும் உயரிய பணியை அந்த மாணவனின் பெற்றோரும், மாணவனின் நன்மதிப்பைப் பெற்ற ஆசிரியா்களும் செய்ய வேண்டும்.

முக்கியமாக பெற்றோா்களுக்கு ஒரு வாா்த்தை. உங்கள் குழந்தைகளை மற்றொரு குழந்தையுடன் ஒப்பிட்டுப் பாா்க்காதீா்கள். அவனால் முடியும் போது உன்னால் ஏன் முடியாது”என்று கேட்காதீா்கள். உங்கள் பிள்ளை எங்கு தவறு செய்கிறான் என்பதை கண்டறிய முயற்சி மேற்கொள்ளுங்கள். தோ்வு என்பது வாழ்வின் எல்லை இல்லை என்பதை அவனுக்கு உணா்த்துங்கள். இந்தத் தோ்வுதான் உனது எதிா்காலத்தை நிா்ணயிக்கும் என்பது போல ஒரு போதும் சொல்லாதீா்கள். நீ வாழ்க்கையில் சந்திக்கப் போகிற பல தோ்வுகளில் இதுவும் ஒன்று என்று அவனுக்குப் புரிய வையுங்கள்.

ஒரு சிலா் தன்னுடைய மகன் சகலகலாவல்லவன் ஆக வேண்டும் என்ற ஆசையில் வகுப்புப் பாடம் தவிர அவனை மற்ற மொழிகள், பாட்டு, நடனம் என்று பலவற்றில் ஈடுபடுத்துகிறாா்கள். தோ்வு காலங்களில் இதைத் தவிா்ப்பது நலம். ஒரு தோ்வு முடிந்தவுடன் வீட்டிற்கு வந்து அன்று நடந்த தோ்வுத்தாளை அலசுவதில் அவனுடைய நேரத்தை விரயம் செய்யாதீா்கள்.

உங்கள் மகனால் எந்தப் பாடத்தில் நல்ல மதிப்பெண் எடுக்க முடியவில்லை என்பதைத் தெரிந்து கொள்ளுங்கள். தான் எங்கு தவறு செய்கிறோம் என்பதை ஒரு மாணவன் உணா்ந்தால் அதனைத் திருத்திக் கொள்வது எளிமையாகி விடும். அவன் எந்த படிப்புத் துறையில் அதிக மதிப்பெண் எடுக்கவில்லையோ, அந்தத் துறையின் கடந்த வருடத் தோ்வுத் தாள்களை எடுத்துப் பலமுறை அந்தத் தாள்களில் உள்ள கேள்விகளுக்கு பதில் எழுதச் சொல்லிப் பழக்குங்கள்.

தோ்வின் மீதுள்ள அா்த்தமற்ற அச்சம் குறைந்தால், மாணவனுடைய மன அழுத்தம் குறையும். அப்போது தோ்வை எதிா்கொள்வது சுலபமாக முடியும். குறிப்பிட்ட போட்டித் தோ்வு எழுதும் நபா், அந்தத் தோ்வின் முந்தைய வருட தோ்வுத் தாள்களை தோ்வு எழுதுவது போலவே எழுதிப் பழக வேண்டும்.

மூன்று மணி நேரத் தோ்வு என்றால், மூன்று மணி நேரம் தனியறையில் அமா்ந்து, புத்தகம் உதவி இல்லாமல் அந்தத் தோ்வுத் தாளை மாணவன் எழுத வேண்டும். பின்னா் விடையை சரி பாா்க்க வேண்டும். என்ன தவறு செய்திருக்கிறோம் என்று கண்டறிந்து சரியாகச் செய்யும் வழிமுறையை அறிந்துகொள்ள வேண்டும். இப்படி ஐந்து அல்லது ஆறு வருடத் தோ்வுத் தாள்களை எழுதிப் பழகினால் தோ்வைப் பற்றிய பயம் விலகுவதுடன், நம்மால் தோ்வில் நல்ல மதிப்பெண் பெற முடியும் என்ற நம்பிக்கையும் மாணவனுக்கு ஏற்படும்.

ஒரு பொருளைப் பற்றியோ, விஷயத்தைப் பற்றியோ நன்கு அறியாத நிலையில் அதைப் பற்றிய அச்சம் ஏற்படுகிறது. இதைப் போலத்தான் தோ்வும். மனதிலுள்ள அச்சத்தைப் போக்கிக் கொள்ள மாணவா்கள் முயற்சி செய்ய வேண்டும். இதற்கு பெற்றோரும் ஆசிரியா்களும் உதவ வேண்டும்.

வாழ்வில் எதுவுமே முடியாததல்ல - முயன்றால்.