விடியோ வாகனம் மூலம் பிரசாரம்: முன்னணியில் திமுக, அதிமுக

அகண்ட திரை கொண்ட வாகனங்கள் மூலம் செய்யப்படும் பிரசாரத்தில் திமுக, அதிமுக முன்னிலை வகிக்கின்றன.

அகண்ட திரைகளை வேன்களில் பொருத்தி அதன் மூலம் வேட்பாளா்களுக்கு ஆதரவாக பிரசாரம் செய்வதை அரசியல் கட்சிகள் உத்தியாக கடைப்பிடித்து வருகின்றன. அதன்படி, இந்த மக்களவைத் தோ்தல் பிரசாரத்திலும் அகண்ட திரை கொண்ட விடியோ வாகனங்கள் பயன்படுத்தப்படுகின்றன. இதற்கான அனுமதிகளை தமிழக தோ்தல் துறை வழங்கியுள்ளது. அதில், அதிமுகவுக்கு 91 வாகனங்களுக்கும், திமுகவுக்கு 83 வாகனங்களுக்கும், பாஜகவுக்கு 55 வாகனங்களுக்கும் அனுமதி தரப்பட்டுள்ளது. குறைந்தபட்சமாக இந்திய தேசிய காங்கிரஸ் கட்சிக்கு 20 வாகனங்களுக்கும், பாமகவுக்கு 11 வாகனங்களுக்கும் அனுமதி அளிக்கப்பட்டுள்ளதாக தமிழக தோ்தல் துறை தெரிவித்துள்ளது.