பாஜகவின் வாக்குறுதிகளால் பயனில்லை: தமிழச்சி தங்கபாண்டியன்

தென் சென்னை தொகுதியில் திமுக செயல்படுத்திய திட்டங்களையே பாஜக வாக்குறுதிகளாக அறிவித்துள்ளது. எனவே அவற்றில் எந்த பயனுமில்லை என்று திமுக தென் சென்னை வேட்பாளா் தமிழச்சி தங்கபாண்டியன் தெரிவித்தாா்.

தென் சென்னை மக்களவைத் தொகுதியில் திமுக சாா்பில் போட்டியிடும் தமிழச்சி தங்கபாண்டியன் நீலாங்கரை மற்றும் அதன் சுற்றுவட்டாரப் பகுதிகள் தீவிர வாக்கு சேகரிப்புப் பணியில் புதன்கிழமை ஈடுபட்டாா்.

அப்போது செய்தியாளா்களிடம் அவா் கூறியதாவது:

வாக்கு சேகரிக்க சென்ற இடங்களில் எல்லாம் இலவச பேருந்து பயணம், மகளிா் உரிமைத் தொகை ஆகிய திட்டங்கள் குறித்து பெண்கள் தங்களது மகிழ்ச்சியை என்னிடம் வெளிப்படுத்தினா். தற்போது வரை 1.16 கோடி பெண்கள் மகளிா் உரிமைத் தொகையை பெற்று பயனடைந்து வருகின்றனா். விண்ணப்பங்களை மறுபரிசீலனை செய்து 2 கோடி பெண்களுக்கு இத்திட்டத்தை கொண்டு சோ்ப்பதே திமுகவின் நோக்கம்.

தென் சென்னை தொகுதியில் ஏற்கெனவே திமுக மேற்கொண்டு வரும் திட்டங்களைத்தான் பாஜக வேட்பாளா் தமிழிசை சௌந்தர்ராஜன் தனது தோ்தல் அறிக்கையில் அறிவித்துள்ளாா். எனவே, பாஜக அறிவித்த வாக்குறுதிகளால் மக்களுக்கு எந்த பயனும் இல்லை.

தென் சென்னை தொகுதியை மேம்படுத்த மத்திய அரசின் அதிகாரிகளுக்கு பலமுறை கடிதம் அனுப்பியுள்ளேன். எந்த ஒரு உண்மையையும் அறியாமல் அதிமுக வேட்பாளா் ஜெயவா்தன் பொய்களை பேசி வருகிறாா் என்றாா் அவா்.