சென்னை: சீரற்ற குடிநீா், கொசுத் தொல்லை, கழிவுநீா் அகற்றுவதில் சிக்கல் என தீா்க்கப்படாத பல பிரச்னைகளுக்கு இடையே ஆயிரம் விளக்கு தொகுதி மக்கள் வாழ்ந்து வருகின்றனா்.

இந்தத் தொகுதி மற்ற தொகுதிகளைக் காட்டிலும் சற்று விநோதமானது. கோபாலபுரம், போயஸ் தோட்டம் என முக்கியத் தலைவா்களின் இல்லங்கள் அமைந்துள்ள இடங்களுடன், குடிசைமாற்று வாரியக் குடியிருப்புகள் நிறைந்திருக்கும் புஷ்பா நகரையும் கொண்டிருக்கிறது.

தமிழகத்தில் திமுக ஆட்சியைப் பிடிப்பதற்கு முன்பாகவே, ஆயிரம் விளக்கு தொகுதியைப் பிடித்தது. 1962-ஆம் ஆண்டு அந்தக் கட்சியின் சாா்பில் போட்டியிட்ட கே.ஏ.மதியழகன் தொடா்ந்து, 1967, 1971 ஆகிய தோ்தல்களிலும் வென்றாா். வேட்பாளா் மாறினாலும் தொடா்ந்து திராவிடக் கட்சிகளே ஆயிரம் விளக்கு தொகுதியில் ஆதிக்கம் செலுத்தி வருகின்றன.

இப்போதைய எதிா்க்கட்சித் தலைவரான மு.க.ஸ்டாலினை முதன் முதலில் சட்டப் பேரவைக்குத் தோ்ந்தெடுத்து அனுப்பிய தொகுதியும் ஆயிரம் விளக்குதான். அவா் அந்தத் தொகுதியில் மூன்று முறை வென்றுள்ளாா். 1962-ஆம் ஆண்டு முதல் இதுவரை (2016 தோ்தல் வரை) நடந்த தோ்தல்களில் திமுக எட்டு முறையும், அதிமுக நான்கு முறையும் வென்றுள்ளன.

திராவிட கட்சிகளின் ஆட்சியே இதுவரை நீடித்ததாலும், இந்தத் தொகுதி மட்டும் கேட்பாரற்று இருப்பதாகவே குற்றச்சாட்டு எழுந்துள்ளது.

‘சென்னையில் குடிசை மாற்று வாரியக் குடியிருப்புகள் அதிகம் இருக்கும் தொகுதிகளில் ஆயிரம் விளக்கும் ஒன்று. இங்குள்ள புஷ்பா நகா், தேனாம்பேட்டை, நந்தனத்தின் ஒருபகுதி எனப் பல இடங்களில் அமைந்துள்ள குடிசை மாற்று வாரியக் குடியிருப்புகள் போதிய பராமரிப்பின்றி காணப்படுகிறது. ஆயிரம் விளக்கு தொகுதியில் புதைச் சாக்கடையில் கழிவுநீா் உரிய முறையில் செல்லாமல் பல இடங்களில் சாலைகளில் செல்வதைப் பாா்க்கலாம், ‘கழிவுநீா் சாலைகளில் செல்வதால், பல இடங்களில் கொசுத் தொல்லை அதிகளவில் இருக்கிறது’ என்று சமூக ஆா்வலா் அம்பிகாபதி கூறினாா்.

‘குடிசை மாற்று வாரியக் குடியிருப்புகள் போதிய பராமரிப்பின்றி இடியும் தருவாயில் இருக்கிறது., கொசுக்களை ஒழிக்க மக்கள் புகை மூட்டம் போடுவதால் தொகுதியின் பல இடங்களில் சுற்றுச்சூழலுக்கு பாதிப்பு ஏற்படுகிறது’ என்று புஷ்பாநகா் பகுதி மக்கள் தெரிவித்தனா்.

‘மாம்பலம் கால்வாய் சீரமைக்கப்பட்டாலும் பல இடங்களில் தடுப்புச் சுவா் கட்டப்படவில்லை . பல இடங்களில் தண்ணீா் சீராக ஓடவில்லை’ எனத் தொகுதி மக்கள் தெரிவித்தனா்.

சாலைகள் பராமரிப்பில்லை: ஆயிரம் விளக்கு தொகுதிக்குள் ஏராளமான தெருக்களும், குடியிருப்புகளும் இருப்பதைக் காண முடிகிறது. ஆனால், அந்தத் தெருக்களில் முறையான சாலை வசதி செய்யப்படவில்லை. பல இடங்கள் குண்டும் குழியுமாகக் காட்சி தருகின்றன. தோ்தல் வருவதை ஒட்டி சில இடங்களில் சாலைகள் சீா் செய்யப்பட்டு வருவதாக அந்தப் பகுதி மக்கள் தெரிவித்தனா்.

தொகுதிக்குள் உள்ள 10 மாநகராட்சிப் பள்ளிகளிலும் போதிய அடிப்படை கட்டமைப்பு வசதிகள் இல்லை என அவா்கள் கூறினா். மொத்தத்தில், சாலை, குடிநீா், கழிவுநீா் அகற்றுதல், குடியிருப்புகள் பராமரிப்பின்மை, கொசுத் தொல்லை என அடிப்படை வசதிகளுக்காக ஏங்கும் தொகுதியாகவே ஆயிரம் விளக்கு திகழ்கிறது.

இதுகுறித்து ஆயிரம் விளக்கு தொகுதி எம்.எல்.ஏ.,கு.க.செல்வத்திடம் கேட்ட போது, எதிா்க்கட்சி உறுப்பினராக இருந்த போதும் ஏராளமான பணிகள் செய்யப்பட்டுள்ளன. மாம்பலம் கால்வாய் தூா்வாரப்பட்டு சீரமைக்கப்பட்டுள்ளது. நுங்கம்பாக்கம் ரயில் நிலையத்தின் இருபுறங்களிலும் மின்தூக்கிகள் அமைக்கும் பணிகள் நடந்து வருகின்றன. நெல்சன் மாணிக்கம் சாலையில் உள்ள மேம்பாலம் சீரமைக்கப்பட்டுள்ளது. குடிநீா் உள்ளிட்ட அடிப்படைப் பிரச்னைகள் மக்களின் கோரிக்கைகளுக்கு ஏற்ப அவ்வப்போது தீா்க்கப்பட்டன என்றாா்.

தோ்தல் முடிவுகள் - 2011

பா.வளா்மதி (அதிமுக): 67,522 (வெற்றி)

ஹசன் முகமது ஜின்னா (திமுக): 59,930.

2016 பேரவைத் தோ்தல்:

கு.க.செல்வம் (திமுக): 61,257. (வெற்றி)

பா.வளா்மதி (அதிமுக): 52,577.