சீனா, மங்கோலியா ஆகிய நாடுகளுக்கு இந்திய வெளியுறவுத்துறை அமைச்சர் சுஷ்மா ஸ்வராஜ் பயணம் மேற்கொள்கிறார். இதுகுறித்து மத்திய வெளியுறவுத்துறை அமைச்சகம் வியாழக்கிழமை வெளியிட்டுள்ள செய்திக்குறிப்பில் தெரிவிக்கப்பட்டுள்ளதாவது:

ஏப்ரல் 22 மற்றும் 23-ஆம் தேதி சீனா, 24 மற்றும் 25-ஆம் தேதிகளில் மங்கோலியா ஆகிய நாடுகளுக்கு மத்திய வெளியுறவுத்துறை அமைச்சர் சுஷ்மா ஸ்வராஜ் பயணம் மேற்கொள்கிறார்.

இந்த பயணத்தின் போது சீனாவில் நடைபெறவுள்ள ஷாங்காய் கூட்டுறவு அமைப்பின் கருத்தரங்கில் கலந்துகொள்கிறார். இதில் 2017-ஆம் ஆண்டு முதல் இந்தியா முழுநேர பிரதிநிதியாக இணைந்துள்ளது. 

பின்னர் சீனா வெளியுறவுத்துறை அமைச்சர் வாங் ஈ உடன் சுஷ்மா ஸ்வராஜ் இரு நாடுகளின் உறவு குறித்து கலந்துரையாடுகிறார் என்று வெளியுறவுத்துறை செய்தித்தொடர்பாளர் ரவீஷ் குமார் தெரிவித்துள்ளார்.

இந்தியா, சீனா ஆகிய நாடுகளின் எல்லைப் பகுதியில் அமைந்துள்ள டோக்லாம் பிரச்னை கடந்த 1 வருடமாக நீடித்து வரும் நிலையில், இவர்களின் சந்திப்பு நடைபெறவுள்ளது குறிப்பிடத்தக்கது.