கர்நாடக மாநிலத்தின் 225 தொகுதிகளுக்கான சட்டப்பேரவைத் தேர்தல் வருகிற மே 12-ஆம் தேதி நடைபெறுகிறது. பின்னர் மே 15-ஆம் தேதி வாக்கு எண்ணிக்கை நடைபெறவுள்ளது. இதையடுத்து அங்கு போட்டியிடும் 2-ஆம் கட்ட வேட்பாளர் பட்டியலை பாஜக திங்கள்கிழமை வெளியிட்டுள்ளது.

முன்னதாக, ஏப்ரல் 9-ஆம் தேதி 72 பேர் கொண்ட முதல்கட்ட வேட்பாளர் பட்டியலை பாஜக வெளியிட்டது. அதில் கர்நாடக முன்னாள் முதல்வரும், பாஜக முதல்வர் வேட்பாளருமான பி.எஸ்.எடியூரப்பா ஷிகர்பூர் தொகுதியில் இருந்து போட்டியிடுகிறார்.

இந்நிலையில், 82 தொகுதிகளில் போட்டியிடும் 2-ஆம் கட்ட வேட்பாளர் பட்டியலை பாஜக வெளியிட்டுள்ளது. இதில், அக்கட்சியின் பழங்குடியின தலைவரும், தற்போது எம்.எல்.சி-யுமாக உள்ள சித்தராஜு ஹெக்கடதேவன்கோட்டே எனுமிடத்தில் களமிறங்குகிறார். 

மற்றொரு பாஜக முக்கியத் தலைவர்களில் ஒருவரான அசோக் பூஜாரி கோகாக் தொகுதியில் போட்டியிடுகிறார். இது காங்கிரஸ் கட்சியின் கோட்டையாக திகழ்கிறது.