புது தில்லி: குடியுரிமைத் திருத்தச் சட்டத்துக்கு எதிராக போராடி வரும் காங்கிரஸ் கட்சி, இதேச் சட்டத்தை 2003ம் ஆண்டு நாடாளுமன்றத்தில் வலியுறுத்தியதாக பாஜக தெரிவித்துள்ளது.

குடியுரிமைத் திருத்தச் சட்டத்தை வலியுறுத்தி முன்னாள் பிரதமர் மன்மோகன் சிங், 2003ம் ஆண்டு மாநிலங்களவையில் பேசிய விடியோவையும் பாஜக வெளியிட்டுள்ளது.
 

பாஜகவின் அதிகாரப்பூர்வ டிவிட்டர் பக்கத்தில் கூறப்பட்டிருப்பதாவது, 2003ம் ஆண்டு மாநிலங்களவையில் எதிர்க்கட்சித் தலைவராக இருந்த மன்மோகன் சிங், குடியுரிமைத் திருத்தச் சட்டத்தை வலியுறுத்திப் பேசியுள்ளார் என்று கூறி, மாநிலங்களவையில் மன்மோகன் சிங் பேசிய விடியோவையும் இணைத்துள்ளது.

அந்த விடியோவில், குடியுரிமைச் சட்டத்தில் திருத்தம் செய்யப்பட வேண்டியதை வலியுறுத்தி மன்மோகன் சிங் பேசிய காட்சிகள் இடம்பெற்றுள்ளது.

2003ம் ஆண்டு குடியுரிமைச் சட்டத்தில் திருத்தம் மேற்கொள்ள வேண்டும் என்று வலியுறுத்திய காங்கிரஸ் கட்சி, தற்போது மத்திய அரசு கொண்டு வந்திருக்கும் குடியுரிமைத் திருத்தச் சட்டத்தை திரும்பப் பெறக் கோரி போராட்டம் நடத்தி வருவதாக பாஜக குற்றம்சாட்டியுள்ளது.