காங்கிரஸ் கட்சி சார்பில் மக்களவைத் தேர்தலில் போட்டியிடும் வேட்பாளர்களின் 5-ஆவது பட்டியல் திங்கள்கிழமை வெளியிடப்பட்டது. இதில் ஆந்திரத்துக்கு 22 வேட்பாளர்களும், மேற்கு வங்கத்துக்கு 11 வேட்பாளர்களும், தெலங்கானாவுக்கு 8 வேட்பாளர்களும், ஒடிஸாவுக்கு 6, அஸ்ஸாமுக்கு 5, உத்தரப் பிரதேசத்துக்கு 3 வேட்பாளர்களும் அறிவிக்கப்பட்டுள்ளனர்.
மேற்கு வங்கத்தில் இடதுசாரிக் கட்சிகளுடன் கூட்டணிப் பேச்சுவார்த்தையை காங்கிரஸ் கட்சி நிறுத்திவிட்டது.
இந்நிலையில், அந்த மாநிலத்துக்கும் வேட்பாளர்கள் அறிவிக்கப்பட்டுள்ளனர்.
அதில், குடியரசு முன்னாள் தலைவர் பிரணாப் முகர்ஜியின் மகன் அபிஜித் முகர்ஜி, மேற்கு வங்க காங்கிரஸ் தலைவர் அதிர் ரஞ்சன் செளதரி, முன்னாள் மத்திய அமைச்சரான மறைந்த பிரியரஞ்சன் தாஸ் முன்ஷியின் மனைவி தீபா தாஸ் முன்ஷி ஆகியோரது பெயர்கள் இடம் பெற்றுள்ளன.