புது தில்லி: வேளாண் சட்டங்களுக்கு எதிரான போராட்டத்தைக் கைவிட்டு, பேச்சுவாா்த்தைக்கு விவசாயிகள் முன்வர வேண்டும் என்று மத்திய வேளாண்துறை அமைச்சா் நரேந்திர சிங் தோமா் மீண்டும் வலியுறுத்தியுள்ளாா்.

தில்லியில் போராட்டத்தை விவசாயிகள் தொடா்ந்து முன்னெடுத்து வரும் சூழலில், அமைச்சா் தோமா் செய்தியாளா்களிடம் வெள்ளிக்கிழமை கூறுகையில், ‘‘வேளாண் சட்டங்கள் தொடா்பாக பஞ்சாப் விவசாயிகள் தவறான புரிதலைக் கொண்டுள்ளனா். அச்சட்டங்களுக்கு எதிரான போராட்டத்தைக் கைவிட்டு, விவசாயிகள் மத்திய அரசுடன் பேச்சுவாா்த்தை நடத்த முன்வர வேண்டும்.

மத்திய அரசு இயற்றிய வேளாண் சட்டங்களின் நன்மைகள் குறித்து போராட்டத்தில் ஈடுபட்டு வரும் விவசாயிகள் விரைவில் புரிந்து கொள்வாா்கள் என நம்புகிறேன்’’ என்றாா்.

வேளாண் சட்டங்கள் தொடா்பாக அமைச்சா் நரேந்திர சிங் தோமா், மத்திய வா்த்தகத் துறை அமைச்சா் பியூஷ் கோயல் உள்ளிட்டோா் 40 விவசாய சங்கங்களின் பிரதிநிதிகளுடன் 5 கட்ட பேச்சுவாா்த்தைகளில் ஈடுபட்டனா். அவற்றில் எந்தவித உடன்பாடும் எட்டப்படவில்லை. அதைத் தொடா்ந்து நடைபெறவிருந்த 6-ஆம் கட்ட பேச்சுவாா்த்தை ரத்து செய்யப்பட்டது.

வேளாண் சட்டங்கள் குறித்து மத்திய அரசு அனுப்பிய பரிந்துரைகளை விவசாய சங்கங்கள் நிராகரித்தன. அடுத்தகட்ட பேச்சுவாா்த்தையில் பங்கேற்குமாறு மத்திய அரசு விடுத்த அழைப்புகளையும் விவசாயிகள் நிராகரித்தனா். விவசாயிகளுடன் பேச்சுவாா்த்தை நடத்துவதற்குத் தயாராக இருப்பதாக மத்திய அரசு தொடா்ந்து தெரிவித்து வருவது குறிப்பிடத்தக்கது.