திருப்பதி: திருமலை ஏழுமலையான் தரிசன டிக்கெட் பெற திருப்பதியில் 3 இடங்களில் ஏற்படுத்தப்பட்ட கவுண்டர் முன்பு பக்தர்கள் ஏராளமாக திரண்டனர்.

கடந்த 82 நாட்கள் பொது முடக்கத்திற்கு பின் பக்தர்களுக்கு இன்று (வியாழக்கிழமை) முதல் ஏழுமலையான் தரிசனம் கிடைக்க உள்ளது. அதற்காக தேவஸ்தானம் ஆன்லைன் முன்பதிவில் 3 ஆயிரம் டிக்கெட்டுகள், நேரடி முன்பதிவில் 3 ஆயிரம் டிக்கெட்டுகள் என தினசரி 6 ஆயிரம் டிக்கெட்டுகளை அளித்து வருகிறது.

இணையதள முன்பதிவு கடந்த 8ம் தேதி முதல் தொடங்கிய நிலையில், நேரடி முன்பதிவுகள் புதன்கிழமை காலை 5 மணி முதல் தொடங்கியது. நேரடி முன்பதிவு டிக்கெட்டுகள் பெற திருப்பதியில் உள்ள சீனிவாசம், விஷ்ணுநிவாசம், அலிபிரியில் உள்ள பூதேவி காம்பளக்ஸ் உள்ளிட்ட இடங்களில் 18 கவுண்டர்களை தேவஸ்தானம் ஏற்படுத்தியது.

இந்த டிக்கெட்டுகளை பெற பக்தர்கள் அதிகாலை 2 மணி முதல் கவுண்டர்களின் முன்பு கூடினர். தரிசன டிக்கெட்டுகள் பெற பல மணிநேரம் சமூக இடைவெளியைப் பின்பற்றி பக்தர்கள் காத்திருந்தனர்.

ஆனால் முன்பதிவு தொடங்கிய 3 மணி நேரத்தில் 3 ஆயிரம் டிக்கெட்டுகள் முன்பதிவு செய்யப்பட்ட நிலையில், பக்தர்கள் காத்திருப்பை கண்ட தேவஸ்தான அதிகாரிகள் மறுநாள் முன்பதிவிற்கான டிக்கெட்டுகளை புதன்கிழமை வழங்கத் தொடங்கினர். ஆயினும் பக்தர்கள் கூட்டம் குறையாததால் சனிக்கிழமைக்கான தரிசன டிக்கெட்டுகளும் தொடர்ந்து அளிக்கப்பட்டது.